१२६ पॉझिटिव्ह, तिघांचा मृत्यू

भंडारा जिल्ह्यात लॉकडाऊन घोषित झाला तेव्हापासून आरटीपीसीआर तपासणी केली जात आहे. पहिला रुग्ण एप्रिल महिन्याच्या शेवटच्या आठवड्यात आढळून आला होता. अलिकडे अ‍ॅन्टीजेन टेस्ट किटद्वारे तपासणी केली जात आहे. जिल्ह्यात आतापर्यंत ४८ हजार ४११ व्यक्तींची कोरोना तपासणी करण्यात आली आहे. त्यापैकी ४२ हजार ४२१ व्यक्ती निगेटिव्ह आढळून आले तर पॉझिटिव्ह आढळून आलेल्या ५९९० व्यक्तींपैकी ४११२ व्यक्तींनी कोरोनावर यशस्वी मात केली आहे.

ठळक मुद्देरविवारी १०६ जणांची सुटी : जिल्ह्यात आतापर्यंत ५ हजार ९९० व्यक्ती कोरोनाबाधित

लोकमत न्यूज नेटवर्क
भंडारा : जिल्ह्यात कोरोना रुग्णांची संख्या दिवसेंदिवस वाढत आहे. जिल्ह्यात आतापर्यंत ४८ हजार ४११ व्यक्तींची अ‍ॅन्टीजेन आणि आरटीपीसीआर तपासणी करण्यात आली. त्यात ५९९० व्यक्ती पॉझिटिव्ह आढळून आले आहेत. दरम्यान रविवारी कोरोनामुळे तिघा जणांचा मृत्यू झाला आहे.
भंडारा जिल्ह्यात लॉकडाऊन घोषित झाला तेव्हापासून आरटीपीसीआर तपासणी केली जात आहे. पहिला रुग्ण एप्रिल महिन्याच्या शेवटच्या आठवड्यात आढळून आला होता. अलिकडे अ‍ॅन्टीजेन टेस्ट किटद्वारे तपासणी केली जात आहे. जिल्ह्यात आतापर्यंत ४८ हजार ४११ व्यक्तींची कोरोना तपासणी करण्यात आली आहे. त्यापैकी ४२ हजार ४२१ व्यक्ती निगेटिव्ह आढळून आले तर पॉझिटिव्ह आढळून आलेल्या ५९९० व्यक्तींपैकी ४११२ व्यक्तींनी कोरोनावर यशस्वी मात केली आहे. ८८३ जणांचा अहवाल अजूनही अप्राप्त आहे.
तपासणीच्या तुलनेत पॉझिटिव्ह रुग्णांची संख्या कमी असल्याने ही जिल्ह्यासाठी दिलासादायक बाब आहे. नागरिकही आता कोरोनाबाबत जागृक झाले असून संसर्ग टाळण्यासाठी स्वत:हून विविध उपाययोजना करताना दिसत आहे. जिल्ह्यातील एक लाख २० हजार ०६२ नागरिकांनी आरोग्य सेतू अ‍ॅप डाऊनलोड केला असून त्यामाध्यमातून कोरोनाबाबत इत्यंभूत माहिती मिळत आहेत.
तसेच माझे कुटुंब, माझी जबाबदारी या मोहीमेंतर्गत गावागावात तपासणी मोहीम राबविली जात आहे.

आयसोलेशन वॉर्डात ८९ रुग्ण
जिल्हा सामान्य रुग्णालयातील आयसोलेशन वॉर्डात सध्यास्थितीत ८९ रुग्ण कोविड अंतर्गत उपचार घेत आहेत. विशेष म्हणजे आतापर्यंत २२३७ व्यक्तींना आयसोलेशन वॉर्डातून सुटी देण्यात आली आहे. अतितिव्र श्वासदाह असलेल्या रुग्णांवर नजर ठेवली जात आहे. तसेच नागरिकांनी तपासणीसाठी समोर यावे, असे आवाहन केले आहे.

सर्वाधिक रुग्ण भंडारा तालुक्यात
जिल्ह्यात रविवारी १२६ व्यक्तींचा अहवाल पॉझिटिव्ह आला. त्यात भंडारा तालुक्यातील ५४, साकोली १७, लाखांदूर १३, मोहाडी ८, पवनी २३, लाखनी ११ रुग्णांचा समावेश असून तुमसर तालुक्यात एकही रुग्ण आढळून आला नाही. भंडारा तालुक्यातील एकूण रुग्णांची संख्या आता ३०८५ झाली आहे. त्यामुळे जिल्ह्यात सर्वाधिक रुग्ण भंडारा तालुक्यात आहे. तसेच साकोली तालुक्यात एकुण रुग्ण संख्या ४५९, लाखांदूर २६७, तुमसर ५२२, मोहाडी ५५२, पवनी ५४८ तर लाखनी तालुक्यात ५५७ रुग्ण आहेत.

कोविडमुळे तरुणाचा मृत्यू
जिल्ह्यात रविवारी कोरोनामुळे तीन जणांचा मृत्यू झाला असून त्यापैकी एका ३२ वर्षीय तरुणाचाही समावेश आहे. सदर तरुण हा तुमसर तालुक्यातील रहिवासी होता. तसेच भंडारा तालुक्यातील ६५ वर्षीय वृध्द कोरोनाने मृत पावले. तर साकोली तालुक्यातील ६६ वर्षीय वृध्दाचा कोरोनामुळे जिल्हा सामान्य रुग्णालयात मृत्यू झाला.