आता केवळ रामलला नाही, तर श्रीराम दरबाराचेही करा दर्शन; १ दिवसात किती भाविकांना पाहता येणार?

Ayodhya Ram Mandir News: आता अयोध्येत गेल्यावर केवळ राम दर्शन नाही, तर श्रीरामांचा दरबारही पाहता येणार आहे.

Ayodhya Ram Mandir News: अयोध्येतील राम मंदिरामध्ये रामललांच्या मूर्तीची प्राणप्रतिष्ठापना गतवर्षी करण्यात आली होती. त्यानंतर ०५ जून २०२५ रोजी राम मंदिरात स्थापन करण्यात आलेल्या श्रीराम दरबाराची विधिवत प्राणप्रतिष्ठापना करण्यात आली. परंतु, श्रीरामांचा दरबार भाविकांना दर्शनासाठी खुला होणार का, याबाबत तेव्हा स्पष्टता नव्हती. आता मात्र याबाबत निर्णय घेण्यात आलेला आहे. आता अयोध्येत गेल्यावर केवळ रामललाचे दर्शन नाही, तर श्रीरामांचा दरबारही पाहता येणार आहे. 

श्रीराम जन्मभूमीवर नव्याने बांधण्यात येत असलेल्या भव्य राम मंदिराच्या पहिल्या मजल्यावर असलेल्या राजदरबारामध्ये श्रीराम विराजमान झाले. पहिल्या मजल्याचे काम सुरू झाल्यानंतर त्यामध्ये राम दरबार स्थापपन करण्यात आला आहे. तसेच त्याची प्राणप्रतिष्ठापना करण्यात आली आहे. पहिल्या मजल्यासह मंदिराच्या मुख्य कळसाचे काम पूर्ण झाले आहे. राम जन्मभूमीचे हे मुख्य शिखर सुवर्णजडित आहे. त्याचीही विधिवत स्थापना आणि पूजन करण्यात आले. राम मंदिरामध्ये २१ मूर्तींची स्थापना करण्यात आली. ईशान्य कोपऱ्यामध्ये शिवलिंग, अग्निकोनामध्ये श्रीगणेश, दक्षिण मध्य भागात महाबली हनुमान, नैऋत्य दिशेला सूर्यदेवता, वायव्येला माता भगवती, उत्तर मध्यमध्ये माता अन्नपूर्णा, मुख्य मंदिरातील पहिल्या मजल्यावर श्री राम दरबार, तर दक्षिण पश्चिमेला शेषावतार मंदिराची प्राणप्रतिष्ठापना करण्यात आली. यानंतर आता भाविकांना श्रीरामांचा दरबार पाहता येणार आहे. 

संपूर्ण राम दरबार पर्यटकांना, भाविकांना सुलभपणे पाहता येऊ शकेल

श्रीराम दरबाराच्या दर्शनाची सुविधा व्यवस्थित आणि सुरळीत करण्यासाठी श्रीराम मंदिर ट्रस्टने एका दिवसांत सहा स्लॉट उपलब्ध करून दिले आहेत. प्रत्येक स्लॉटमध्ये जास्तीत जास्त ३०० भाविक दर्शन घेऊ शकतील. प्रत्येक स्लॉटसाठी वेळ दोन तास ठेवण्यात आला आहे. प्रत्येक स्लॉटमध्ये एकूण ३०० पास दिले जाणार आहेत. हे पास जिल्हा प्रशासन आणि राम मंदिर ट्रस्ट या दोन संस्थांमध्ये विभागले गेले आहेत. दोघांनाही प्रत्येक स्लॉटसाठी १५०-१५० पास देण्यात आले आहेत. श्री राम जन्मभूमी तीर्थ क्षेत्र ट्रस्टचे शरद शर्मा म्हणाले की, भाविकांना चांगला अनुभव देण्याच्या उद्देशाने ही स्लॉट आणि पासची नवीन व्यवस्था करण्यात आली आहे. संपूर्ण राम दरबार पर्यटकांना, भाविकांना सुलभपणे पाहता येऊ शकेल.

दरम्यान, सकाळी ९ वाजल्यापासून श्रीराम दरबाराचे दर्शन सुरू होणार आहे. रात्रौ ९ वाजेपर्यंत श्रीराम दरबाराचे दर्शन घेता येणार आहे. या राम दरबारात राजा श्रीराम, माता सीता, लक्ष्मण आणि हनुमान यांचे दर्शन घेता येणार आहे.