ज्याला बाप समजले त्यानेच कुकर्म केले; रिलेशनशिपमधील महिलेच्या अल्पवयीन मुलीवर अत्याचार

दारूच्या नशेत दुपारी घरी झोपलेल्या अल्पवयीन मुलीवर केला अत्याचार

अंबाजोगाई : रिलेशनशिपमधील महिलेच्या १२ वर्षीय मुलीवर अत्याचार केल्याची खळबळजनक घटना १९ एप्रिल रोजी येथे समोर आली. यावरून ॲट्रॉसिटी, बाल लैंगिक अत्याचार प्रतिबंधक व बलात्कार कायद्यान्वये गुन्हा नोंद झाला.

दत्ता शिवाजी जाधव असे आरोपीचे नाव आहे. पोलिसांच्या माहितीनुसार, शहरात ३५ वर्षीय महिला १४ वर्षांचा मुलगा व १२ वर्षीय मुलीसोबत राहते. पतीने १० वर्षांपूर्वी अन्य एका महिलेसोबत पलायन केल्यावर महिला दोन मुलांसह दत्ता जाधवसोबत शहरात लिव्ह इन रिलेशनशिपमध्ये राहते. १९ एप्रिल रोजी महिला भाजीपाला विक्रीसाठी गेली होती. यावेळी दुपारी २ वाजता शेजाऱ्याच्या मोबाईलवरून तिच्या सहावीत शिकणाऱ्या मुलीने रडत फोन करून आपबिती कथन केली. 

त्यानंतर महिलेने घर गाठून चौकशी केली तेव्हा दारूच्या नशेत दत्ता जाधव याने दुपारी घरी झोपलेल्या अल्पवयीन मुलीसोबत कुकर्म केल्याचे उघड झाले. याप्रकरणी महिलेने शहर ठाण्यात जाऊन तक्रार दिली. त्यानुसार, गुन्हा नोंद करण्यात आला. उपअधीक्षक सुनील जायभाये पुढील तपास करत आहेत.