लोकमत न्यूज नेटवर्क
केज : जालना येथून सोयाबीन, उडीद पिकांचे बियाणे घेऊन जात असताना अज्ञात चोरट्यांनी चालत्या पिकअपमधून २० हजार १०० रुपयांचे बियाणे लंपास केले. ही घटना केजजवळील टोलनाक्यावर रविवारी मध्यरात्री घडली. याप्रकरणी केज पोलिसांत गुन्हा दाखल झाला आहे.
जालना येथील बियाणांच्या कंपनीतून चालक भाऊसाहेब काशीनाथ शिंदे (रा. बनगाव, ता. अंबड) हे पिकअपमध्ये (क्रमांक एम.एच.०४, एफ.पी. २१८६) सोयाबीन पिकाच्या बियाणांच्या ११० गोण्या व उडीद बियाणांची १० पोती भरून लातूर येथे निघाले होते. रविवारी मध्यरात्री दोन ते अडीच वाजण्याच्या सुमारास केज-मांजरसुंबा रस्त्यावर नव्याने होत असलेल्या टोलनाक्याजवळ वाहनाची गती कमी होताच अज्ञात चोरटे पिकअपवर चढले. त्यांनी पिकअपवरील ताडपत्री फाडून सोयाबीन बियाणांची तीन पोती, उडीद बियाणांची तीन पोती असा २० हजार १०० रुपयांच्या बियाणांची पोती अज्ञात चोरट्यांनी लंपास केली.
दरम्यान, पिकअप चालक भाऊसाहेब शिंदे यांच्या फिर्यादीवरून अज्ञात चोरट्यांविरुद्ध केज पोलिसांत चोरीचा गुन्हा दाखल करण्यात आला आहे. पोलीस निरीक्षक प्रदीप त्रिभुवन यांच्या मार्गदर्शनाखाली पोलीस नाईक धनपाल लोखंडे हे पुढील तपास करीत आहेत.