लोकमत न्यूज नेटवर्क
बीड : कोरोनाच्या काळात इतरांचे आरोग्य सदृढ राहण्यासाठी धावपळ करणाऱ्या डॉक्टरांचे आरोग्य बिघडल्याचे दिसत आहे. वर्षभरापासून सुरू असलेल्या या महामारीमुळे डॉक्टरांचे वजन घटल्याचे समोर आले आहे. असे असले तरी त्यांनी रुग्णसेवेकडे दुर्लक्ष केले नसल्याचे दिसत आहे.
कोरोनाकाळात डॉक्टरांवर मानसिक ताण तर होताच, शिवाय धावपळही वाढली. त्यामुळे राेजचा व्यायाम, नियमित व वेळेवर आहार मिळाला नाही. याचा परिणाम आरोग्यावर झाला. मानसिक आणि शारीरिक ताण येण्याची ही बहुधा पहिलीच वेळ आहे; परंतु अपवादात्मक वगळता सर्वच डॉक्टरांनी कौतुकास्पद सेवा दिलेली आहे.
कोरोनामुळे रोजचा व्यायामही कमी
आपल्या आरोग्यासाठी डॉक्टर रोज योगा व व्यायाम करत असे; परंतु कोरोनामुळे अनेकांचा नियमित केला जाणारा व्यायाम आता बंद आहे.
त्यामुळे काहींचे आरोग्य बिघडले आहे. असे असले तरी त्यांनी आपल्या कर्तव्यात कसूर केलेला नाही. काही अपवाद वगळता सर्वच डॉक्टर सेवा देतात.
सरकारी रुग्णालयातील डॉक्टर तर सेवा देतच आहेत; परंतु खाजगी डॉक्टरही रोटेशनप्रमाणे शासकीय रुग्णालयात जाऊन रुग्णसेवा करत असल्याचे दिसून येत आहे. याचा रुग्णांना फायदा होत आहे.
शारीरिक आणि मानसिक ताण एकाचवेळी आल्याने परिणाम
पहिल्या लाटेत कोरोनाचे रुग्ण कमी होते; परंतु दुसऱ्या लाटेत परिस्थिती भयानक झाली. डॉक्टर, कर्मचाऱ्यांची संख्याही अपुरी पडत होती.
अशावेळी आहे त्या डॉक्टर, कर्मचाऱ्यांवर कामाचा ताण वाढला. त्यांची धावपळ वाढली.
यामुळेच डाॅक्टर, कर्मचाऱ्यांचे आरोग्य बिघडत चालले असून, प्रतिकारशक्ती कमी होत आहे.
या महामारीत शारीरिक आणि मानसिक ताण वाढला आहे. मात्र, प्रोफेशनल लाइफ आहे, त्यामुळे दूर पळून चालणार नाही. पुरेशी झोप होत नाही. या सर्व धावपळीत माझे चार किलो वजन कमी झाले आहे. असे असले तरी माझी सेवा सुरूच आहे. रुग्णसेवा देताना कष्ट घ्यावे लागत असले तरी त्यात आनंद आहे. माझ्यासारखेच अनेक डॉक्टर या महामारीत कोरोनाबाधित झाले आणि त्यावर त्यांनी मातही केली.
-डॉ. अनिल बारकुल, ज्येष्ठ फिजिशियन
प्रशासनाने सोपविलेली जबाबदारी पार पाडण्यासह कोरोना वॉर्डमध्ये जाऊन राऊंडही घेतो. अशावेळी वेळेवर जेवण होत नाही. तसेच पुरेसा आरामही मिळत नाही. या धावपळीत अंदाजे पाच किलो वजन कमी झाले आहे. मानसिक ताणामुळे चिडचिड वाढली आहे.
-डॉ. महेश माने, जिल्हा रुग्णालय, बीड
मी तर दिवसरात्र धावपळ करतच आहे. माझे वजनही थोडे कमी झाले. माझे सर्व सहकारी उत्तम काम करत आहेत. या महामारीत काम करताना त्यांचे आरोग्याकडे थोडे दुर्लक्ष झाले आहे; परंतु त्यांनी सामान्यांच्या आरोग्याकडे दुर्लक्ष केलेले नाही.
-डॉ. आर. बी. पवार, जिल्हा आरोग्य अधिकारी, बीड