शिरूर कासार : जिल्हाधिकारी बीड यांनी "कोरोना" नियंत्रण संबंधात लागू केलेली नियमावली अर्थात ब्रेक द चेन अनाकलनीय असून, दिलेल्या वेळापत्रकाबाबत फेरविचार करावा, अशी मागणी सर्जेराव तांदळे विचार मंचचे रायमोह येथील गोकुळ सानप यांनी केली आहे. या आदेशामुळे छोटे व्यापारी, मोलमजुरी करणारे मजूर, तसेच हातावर पोट असणाऱ्यांवर उपासमारीची वेळ येणार आहे त्यामुळे प्रशासनाने आदेशाबाबत फेरविचार करावा, असे सानप यांनी म्हटले आहे.
शिरूरकरांचा पांच दिवसांचा उपवास सुरू
शिरूर कासार : येथील जाज्वल्य देवस्थान असलेले शक्तिपीठ म्हणे कालिका देवी, देवीचा कुलाचार असलेला नव्याच्या अमावास्येचा कुलाचार अवघ्या पाच दिवसांवर आला असल्याने बुधवारपासून देवी भक्त एक कर्ता प्रतिनिधी पांच दिवसांचा उपवास करत असतो. या काळात पादत्राणे वर्ज्य असते. अमावास्येला देवीची पालखी, गंगाजलाने अभिषेक व पुरण पोळीचा नैवेद्य समर्पण केल्यानंतरच शिरूरला नवे गहू खाण्यास सुरूवात होते. तोपर्यंत गिरणीतसुध्दा नवे गहू दळून दिले जात नाहीत. ही परंपरा आजही शिरूरकर सांभाळत आहे. शासन नियमावलीतच हा कुलाचार उत्सव पार पाडला जाणार असल्याचे कालिका देवी विश्वस्त अध्यक्ष रोहिदास पाटील व सचिव बापुराव गाडेकर यांनी सांगितले.
आजोळ परिवारास सात क्विंटल धान्यासह किराणाची मदत
शिरूर कासार : तालुक्यातील राक्षस भुवन येथे "आजोळ परिवार" हे निराधार, निराश्रित, दिव्यांगांसाठी हक्काच घर सुरू आहे. मदतीच्या बळावर सुरू असलेल्या या संस्थेस आधार माणुसकीचा ग्रुपचे रणजित पवार, किरण बेद्रे, कृष्णा आदींनी मंगळवारी सात क्विंटल धान्य, किराणा साहित्य तसेच अंधांसाठी काठी व फळे भेट दिली. मदतीबद्दल संस्थेचे कर्ण तांबे यांनी आभार मानत ऋण व्यक्त केले.
शिरूर सिंदफना रस्त्यावर खड्डे
शिरूर कासार : तालुक्याच्या ठिकाणी ये - जा करण्यासाठी दहा - बारा गावांची वर्दळ असलेल्या शिरूर सिंदफना या रस्त्यावर खड्डेच खड्डे असल्याने सर्वांनाच त्रासाला सामोरे जावे लागत आहे. या रस्त्याची दुरूस्तीची गरज असल्याची मागणी परिसरातील ग्रामस्थांनी प्रशासनासह लोकप्रतिनिधींकडे केली आहे.
विनामास्क संचार करणाऱ्यांवर दंडात्मक कारवाई
शिरूर कासार : कोरोना प्रतिबंधासाठी तोंडावर मास्क लावणे हे अनिवार्य असताना काही लोक विनामास्क संचार करत असल्याने त्यांच्यावर दंडात्मक कारवाईचे सत्र सुरूच आहे. मंगळवारी नगर पंचायतीने अडीच हजार रुपये दंड वसूल केला. कामाशिवाय बाहेर फिरूच नका. गरज पडलीच तर मास्कचा वापर करणे बंधनकारक असल्याचे नगरपंचायतीचे मुख्याधिकारी किशोर सानप यांनी सांगितले.
गावात तोंडाला मास्क तर शेतात मोकळा श्वास
शिरूर कासार : कोरोचा वाढता उद्रेक लक्षात घेता गावांत फिरताना तोंडावर मास्क असणे बंधनकारक असले तरी शेतात काम करणारा शेतकरी मात्र शेतात मोकळा श्वास घेत असल्याचे चित्र शिरूर परिसरातील शेतशिवारात फेरफटका मारल्यावर दिसून आले.