बारावीच्या परीक्षेत कॉपीचा सुळसुळाट! ड्रोनने पकडली कॉपी, केंद्र संचालकासह १७ शिक्षकांवर गुन्हा दाखल; प्रशासनाचा मोठा दणका

पर्यवेक्षकांच्या डोळ्यादेखत सुरू होता कॉपीचा महापूर...

बीड : बीड तालुक्यातील चौसाळा येथील परीक्षा केंद्रावर बारावीच्या इंग्रजी पेपरवेळी मंगळवारी सर्रास कॉपी पुरवली जात हाेती. हा सर्व प्रकार ड्रोन कॅमेऱ्यात कैद झाला होता. याची प्रशासनाने गांभीर्याने घेतला असून, याप्रकरणी नेकनूर पोलिस ठाण्यात बुधवारी रात्री १० वाजता १७ जणांविरुद्ध फौजदारी गुन्हा दाखल करण्यात आला आहे. जिल्हाधिकारी विवेक जॉन्सन यांच्या आदेशानंतर शिक्षण विभागाने ही धडक कारवाई केली असून यामुळे शिक्षण क्षेत्रात मोठी खळबळ उडाली आहे.१० फेब्रुवारी रोजी चौसाळा येथील केंद्र क्रमांक २२४ वर इंग्रजीच्या पेपरवेळी ड्रोन कॅमेऱ्याद्वारे चित्रीकरण करण्यात आले होते. यामध्ये १६ परीक्षा दालनांमधील पर्यवेक्षक कॉपीला प्रतिबंध न करता उलट परीक्षार्थ्यांना सर्रास कॉपी पुरविण्यास मदत करत असल्याचे दिसून आले. आरोपींनी संगनमत करून शासनाच्या 'कॉपीमुक्त' मोहिमेला हरताळ फासल्याचे फिर्यादीत म्हटले आहे. याप्रकरणी महाराष्ट्र विद्यापीठ मंडळ गैरप्रकार कायदा १९८२ आणि बीएनएस अंतर्गत गुन्हा नोंदवण्यात आला आहे. सहायक पोलीस निरीक्षक चंद्रकांत गोसावी यांच्या मार्गदर्शनाखाली पोलीस उपनिरीक्षक रोकडे या प्रकरणाचा पुढील तपास करत आहेत.यांच्यावर झाले गुन्हा दाखल -प्रभारी गटशिक्षणाधिकारी समंदर हमीद खान पठाण यांच्या फिर्यादीवरून गुन्हा दाखल झालेल्यांमध्ये केंद्र संचालक संजय घाडगे, भागवत कुरुंद (चौसाळा महाविद्यालय), गोरोबा बचुटे, राजेश्री माने, वसीम शेख, आर. जी. करडकर, एस. आर. दांगट (नेकनूर महाविद्यालय), विनायक वजे, ताराचंद राठोड, ए. बी. अघाव, पी. के. रसाळ, जी. बी. चक्रे (मांजरसुंबा विद्यालय), सी. एस. मुळीक, बी. बी. सुपेकर, यु. डी. उगले, एम. एस. गवई आणि बालासाहेब पवार (लिंबागणेश विद्यालय) यांचा समावेश आहे.बीडमध्ये कॉपीचा सुळसुळाट!बीड जिल्ह्यात १०३ केंद्रांवर बारावीची परीक्षा सुरू असून ४५,२४७ विद्यार्थी भवितव्य अजमावत आहेत. प्रशासनाचे 'कॉपीमुक्त' दावे पहिल्याच इंग्रजीच्या पेपरला फोल ठरले. अनेक केंद्रांवर कॉप्यांचा सुळसुळाट पाहायला मिळाला, तर चौसाळ्यात ड्रोनने हा प्रकार उघड केला. यामुळे पारदर्शक परीक्षेच्या दाव्यांवर प्रश्नचिन्ह उपस्थित होत आहे.