बिहारी कामगारांचे मुले शिकणार बीडच्या जिल्हा परिषद शाळेत; जिल्हाधिकाऱ्यांनी घेतला पुढाकार

बीडच्या जिल्हाधिकाऱ्यांच्या कृतीमुळे दुर्लक्षित घटकांच्या मुलांना शिक्षणाच्या मुख्य प्रवाहात आणण्यात आले.

बीड : बिहार येथून रोजगाराच्या शोधात येथील जिल्हाधिकारी कार्यालय परिसरात बांधकामावर मजूर म्हणून आलेल्या कुटुंबातील तीन बालकांना पोलिस कॉलनीतील जिल्हा परिषद शाळेत मंगळवारी प्रवेश देण्यात आला. जिल्हाधिकाऱ्यांच्या कृतीमुळे दुर्लक्षित घटकांच्या मुलांना शिक्षणाच्या मुख्य प्रवाहात आणण्यात आले. शेख नाजली बेगम मु. नौशाद (इयत्ता तिसरी), शेख शहाजान (इयत्ता दुसरी) व शेख खुशनूरी (इयत्ता पहिली) अशी प्रवेश मिळालेल्या विद्यार्थ्यांची नावे आहेत.

जिल्हाधिकारी विवेक जॉन्सन यांच्या हस्ते या नवप्रवेशितांना शालेय साहित्याचे वितरण करण्यात आले. मुलांशी आपुलकीने संवाद साधत त्यांना नियमित शाळेत उपस्थित राहण्याचे आणि अभ्यासात लक्ष घालण्याचे मार्गदर्शन केले. पालकांनाही मुलांच्या उज्ज्वल भविष्यासाठी त्यांना नियमित शाळेत पाठविण्याबाबत स्पष्ट सूचना दिल्या.

जिल्हाधिकाऱ्यांनी पाहिले अन् त्यांच्या शिक्षणाचा प्रारंभ झाला
जिल्हाधिकारी कार्यालयाच्या नूतन इमारतीचे बांधकाम सुरू आहे. या कामावर बिहार येथील कामगार आहेत. हे कामगार परिसरातच पत्र्याच्या शेडमध्ये राहतात. एके दिवशी त्यांची मुले कार्यालय परिसरात खेळताना दिसून आल्याने जिल्हाधिकारी विवेक जॉन्सन यांनी वाहन थांबवून या मुलांच्या पालकांशी चौकशी केली. ही मुले शाळेत नाहीत का? असा प्रश्न विचारून माहिती घेतली. त्यानंतर शिक्षणाधिकारी भगवान फुलारी यांना कळविले. त्यानुसार गटशिक्षणाधिकारी खान समंदर हमीद यांना सूचित केले. त्यानंतर खान यांनी संबंधित मजूर कुटुंबाशी संवाद साधून त्यांच्या मुलांच्या शिक्षणाची आवश्यकता लक्षात घेतली. त्यानंतर पोलिस कॉलनीतील जिल्हा परिषद शाळेचे मुख्याध्यापक राजेंद्र खेडकर यांच्याशी चर्चा करून प्रवेश प्रक्रिया पूर्ण केली. जिल्हा प्रशासनाच्या सहकार्याने या मुलांच्या शैक्षणिक प्रवासाचा प्रारंभ घडवून आणला.