पहा हा चमत्कार, खेकड्याची चाल!  ट्रॅफिकमध्ये अडकल्यावर EV कारने ९० अंशांत चाकं फिरवली अन् थेट बाजूला सरकली

ट्रॅफिकमध्ये अडकलेल्या एका चिनी इलेक्ट्रिक कारचा हा व्हिडिओ आहे.

टेक्नॉलॉजीच्या जगात चीन नेहमीच नवनवीन शोध लावत जगाला चकित करत असतो. बुलेट ट्रेननंतर आता चीनमधील एका इलेक्ट्रिक वाहनाच्या (EV) व्हायरल व्हिडिओने इंटरनेटवर धुमाकूळ घातला आहे, ज्यात कार चक्क बाजुला होण्यासाठी खेकड्यासारखी चालताना दिसत आहे.

ट्रॅफिकमध्ये अडकलेल्या एका चिनी इलेक्ट्रिक कारचा हा व्हिडिओ आहे. जेव्हा कारला पुढे जाण्यासाठी जागा नसते, तेव्हा ती अचानक तिची चारही चाके ९० अंशांमध्ये बाजूला वळवते आणि हळू हळू सरळ रेषेत बाजूला सरकते. यामुळे क्षणार्धात ती ट्रॅफिक जाममधून बाहेर पडते.

भविष्यातील तंत्रज्ञान
या प्रकारच्या तिरक्या हालचालीला 'क्रॅब वॉकिंग' म्हणतात. हा व्हिडिओ पाहून अनेकांना सिनेमातील दृश्य आठवले असले तरी, हे चीनच्या अत्याधुनिक EV तंत्रज्ञानाचे प्रतीक आहे. BYD Yangwang U7 आणि Baojun Yep सारख्या काही भविष्यवेधी चिनी इलेक्ट्रिक कारमध्ये हे फीचर उपलब्ध असल्याचे सांगितले जात आहे.

पार्किंगची चिंता मिटणार
वाहनचालकांना कमी जागेत गाडी पार्क करताना होणारा त्रास या फीचरमुळे पूर्णपणे संपेल, कारण या तंत्रज्ञानामुळे कार ३६० अंशांमध्ये गोल फिरू शकते. हा व्हिडिओ आतापर्यंत १३ लाखांहून अधिक लोकांनी पाहिला असून, युजर्स विचारत आहेत, "असे फीचर आमच्या शहरातील गाड्यांमध्ये कधी येणार?"