सिट्रोएनने खास स्पोर्ट कार आणली; Citroen C3 चे अंतर-बाह्य रुपडे पालटले... 

Citroen C3 च्या सामान्य व्हेरिअंटपेक्षा २१ हजार रुपयांनी या स्पोर्ट एडिशनची किंमत जास्त ठेवण्यात आली आहे.

सिट्रोएनने हॅचबॅक कार सी ३ चे नवीन स्पोर्ट एडिशन भारतीय बाजारात आणले आहे. यामध्ये कंपनीने थोडेसे हायटेक होण्याचा प्रयत्न केलेला आहे. साडे सहा लाखांमध्ये कंपनीने सिट्रॉएन सी थ्रीला नवीन लुक दिला असून तरुणांना लक्षात घेऊन ते डिझाइन करण्यात आल्याचे कंपनीचे म्हणणे आहे. 

Citroen C3 च्या सामान्य व्हेरिअंटपेक्षा २१ हजार रुपयांनी या स्पोर्ट एडिशनची किंमत जास्त ठेवण्यात आली आहे. एवढेच नाही तर आणखी १५ हजार रुपये मोजले तर तुम्हाला या कारसोबत डॅशकॅम आणि वायरलेस चार्जर मिळणार आहे. याला सिट्रॉएनने टेक किट असे म्हटले आहे. C3 स्पोर्ट एडिशनमध्ये दोन पेट्रोल इंजिन पर्याय देण्यात आले आहेत. १.२-लिटर प्युअरटेक ८२ नॅचरली एस्पिरेटेड इंजिन देण्यात आले असून ८१ बीएचपी पॉवर आणि ११५ एनएम टॉर्क प्रदान करते. यामध्ये ५-स्पीड मॅन्युअल गिअरबॉक्स देण्यात आला आहे. 

दुसऱ्या इंजिन पर्यायामध्ये १.२-लिटर प्युअरटेक ११० टर्बो इंजिन देण्यात आले आहे. जे १०८ बीएचपी पॉवर आणि २०५ एनएम टॉर्क देते. यामध्ये ज्यांना इंजिनमध्ये ताकद जास्त हवीय ते या पर्यायाकडे वळू शकतात, परंतू मायलेज थोडे कमी मिळणार आहे. कंपनीने १८.३ किलोमीटर प्रति लिटर ते १९.३ किलोमीटर प्रति लिटर पर्यंत मायलेज देण्याचा दावा केला आहे. ऑटोमॅटिक टर्बो व्हर्जन फक्त १० सेकंदात ० ते १०० किमी प्रति तासाचा वेग गाठते.

स्पोर्टी लुक येण्यासाठी कंपनीने व्हिज्युअल अपग्रेड्स केले आहेत. कारच्या बॉडीवर 'स्पोर्टी' स्टीकर दिले आहेत. याचबरोबर यात नवीन गार्नेट रेड रंगही देण्यात आला आहे, जो सिट्रॉईन सीथ्री मध्ये पहिल्यांदाच आला आहे. आतमध्ये स्पोर्टी फील येण्यासाठी रेस-प्रेरित पेडल्स, सीटबेल्ट कुशन आणि विशेष सीट कव्हर्स बसवण्यात आले आहेत. केबिनमध्ये अॅम्बियंट लाइटिंग देखील देण्यात आली आहे.