शॉर्टकट रेल्वे क्रॉसिंग ठरते जीवघेणी

रेल्वे रूळ ओलांडून जाण्याची नागरिकांची पद्धत ही अवैध आणि जीवघेणी आहे. रेल्वे रूळ ओलांडून ये-जा करू नये, हे जीवघेणे ठरणारे आहे, असे स्थानकावर वारंवार उद्घोषकाद्वारे सूचना केल्या जातात. या सूचनांचा अव्हेर रेल्वेचे चालक-गार्ड यांच्याकडूनही होतो. फलाटाला लागून असलेल्या पादचारी पुलाचा वापर न करता ते थेट विश्रांतीसाठी असलेली लॉबी गाठतात. मालवाहतुकीमुळे रेल्वे स्थानकावर चालक, गार्ड यांची रेलचेल वाढली आहे.

ठळक मुद्देपुलावरून पायपीटचा कंटाळा : नागरिकांसह रेल्वे कर्मचाऱ्यांकडून नियमाला ठेंगा

लोकमत न्यूज नेटवर्क
अमरावती : रेल्वे रुळावरून क्रॉसिंग करता येत नाही, अशी रेल्वे विभागाची नियमावली आहे. मात्र, बडनेरा रेल्वे स्थानक परिसरात नागरिकांसह रेल्वे कर्मचारीसुद्धा रेल्वे क्रॉसिंगद्वारे शॉर्टकट मार्ग शोधतात. गुरुवारी सकाळी १०.३० च्या सुमारास अवघ्या पाच मिनिटांत १५ जणांनी रूळ ओलांडून बडनेरा रेल्वे स्थानक पार केले. यावरून दिवसभराचा अंदाज येऊ शकतो. हल्ली प्रवासी गाड्या बंद असल्या तरी रेल्वेची मालवाहतूक सुरू आहे.
रेल्वे रूळ ओलांडून जाण्याची नागरिकांची पद्धत ही अवैध आणि जीवघेणी आहे. रेल्वे रूळ ओलांडून ये-जा करू नये, हे जीवघेणे ठरणारे आहे, असे स्थानकावर वारंवार उद्घोषकाद्वारे सूचना केल्या जातात. या सूचनांचा अव्हेर रेल्वेचे चालक-गार्ड यांच्याकडूनही होतो. फलाटाला लागून असलेल्या पादचारी पुलाचा वापर न करता ते थेट विश्रांतीसाठी असलेली लॉबी गाठतात. मालवाहतुकीमुळे रेल्वे स्थानकावर चालक, गार्ड यांची रेलचेल वाढली आहे. फलाटावर ये-जा करण्यासाठी पादचारी पूल, स्वयंचलित पायऱ्या, रॅम्पची व्यवस्था आहे. तथापि, रेल्वेचे चालक, गार्ड हेच नियम गुंडाळून रेल्वे क्रॉसिंग ओलांडून ये-जा करतात. हीच या परिसरातील नागरिकांचीही तºहा आहे.

माताफैल परिसरातून सर्रास रेल्वे क्रॉसिंग
माताफैल भागातील रहिवासी रेल्वे रूळ ओलांडूनच ये-जा करतात. बाजारपेठ, रोजगार अथवा कामानिमित्त नवीवस्ती भागात ये-जा करणाऱ्यासाठी याच शॉर्टकटला ते प्राधान्य देत आले आहे. ही बाब कोणत्याही क्षण जीवघेणी ठरू शकते.

रेल्वे सुरक्षा बलाचे दुर्लक्ष
बडनेरा रेल्वे स्थानक परिसरात चालक, गार्ड यांच्या विश्रांती, जेवणाच्या सुविधेसाठी लॉबी आहे. या लॉबीच्या बाजूला रेल्वे सुरक्षा बलाचे कार्यालय आहे. रेल्वे रूळ ओलांडूनच लॉबीमध्ये ये-जा करीत असताना चालक, गार्ड हे आरपीएफ अधिकाऱ्यांना दिसू नये, याचे आश्चर्य मानले जात आहे. सामान्य प्रवासी अथवा नागरिकांनी रेल्वे क्रॉसिंग केले, तर कायदेशीर कारवाई केली जाते. ही नियमावली चालक, गार्ड यांना का लागू नाही, असा प्रश्न उपस्थित होत आहे.