गजानन मोहोड
अमरावती : कोरोना संकटकाळातही शेतकरी आत्महत्यांचे सत्र सुरूच आहे. अस्मानी व सुल्तानी संकटामुळे पश्चिम विदर्भात यंदा जूनअखेर ४६१ शेतकऱ्यांनी मृत्यूला कवटाळले. गतवर्षी याच कालावधीत ५०० शेतकरी आत्महत्या झाल्या होत्या. दर दोन दिवसात पाच, तर दर नऊ तासात एक शेतकरी आत्महत्या होत आहे.
कर्ज, नापिकी, नैसर्गिक आपत्ती, दुष्काळ यात वऱ्हाडातील शेतकरी अडकला आहे. यामध्ये मुला-मुलींचे शिक्षण, लग्न व घरसंसार कसा करावा, या विवंचनेत शेतकऱ्यांच्या संघर्षात नैराश्य मात करीत आहे. नापिकीच्या दृष्टचक्रात खासगी सावकारांचे कर्ज वाढत आहे. शेतीत उत्पादनखर्चही पदरी पडत नसल्याने पोशिंद्याचा धीर खचून तो मृत्यूचा घोट घेत असल्याचे दुर्देवी चित्र आहे. कोरोनाकाळात यात अंशत: कमी आलेली आहे. अशास्थितीत जिल्हा समितीची सहा-सहा महिने बैठक होत नसल्याने प्रशासनाची याविषयी अनास्था दिसून येत आहे.
राज्यात सर्वाधिक शेतकरी आत्महत्या अमरावती विभागात होत आहे. शेतकरी आत्महत्याप्रवण जिल्ह्यांत शासनाद्वारा अनेक योजना प्राधान्याने राबविण्यात येतात. मात्र, खऱ्या व गरजू शेतकऱ्यांपर्यंत योजनेचा लाभ पोहोचत नाही. शासन व प्रशासनाद्वारा शेतकरी आत्महत्या हा विषयच मुळात गंभीरतेने घेत नसल्यामुळे शेतकरी उपेक्षित राहत असल्याचा आरोप होत आहे.
बॉक्स
सन २००१ पासून १६,८४८ शेतकरी आत्महत्या
विभागात १ जानेवारी २००१ पासून शेतकरी आत्महत्यांची नोंद महसूल विभागाद्वारे घेण्यात येते. त्यानुसार आतापर्यंत १६ हजार ८४८ शेतकरी आत्महत्या झालेल्या आहेत. यामध्ये ७,५६५ प्रकरणात वारसांना शासन मदत देण्यात आलेली आहे. ८,९७३ प्रकरणे अपात्र ठरविण्यात आलेली आहे. याशिवाय ३९० प्रकरणे अद्यापही चौकशीसाठी प्रलंबित आहेत.
बॉक्स
शेतकरी आत्महत्यांची स्थिती (जूनअखेर)
महिना २०१९ २०२० २०२१
जानेवारी ७७ ८३ ७८
फेब्रुवारी ७३ ९७ ७२
मार्च ८२ ५९ ८९
एप्रिल ७१ ५१ ६४
मे ९१ ११६ ७५
जून ८१ ९४ ८२
एकूण ४७५ ५०० ४६०