अमरावती : मतदार यादीत अद्यापही छायाचित्र अपडेट नसलेल्या मतदारांना जिल्हा व तालुका प्रशासनाकडून वेळोवेळी आवाहन करण्यात येत आहे. तथापि, अद्यापही सुमारे ७० हजार मतदारांचा तपशील उपलब्ध नाही. घरभेटी दिल्यानंतर अनेक मतदार यादीत नमूद पत्त्यावर राहत नसल्याचे आढळले आहे. १५ जुलैपर्यंत या ‘नो फोटो व्होटर्स’ची छायाचित्रे जमा न झाल्यास ती वगळण्यात येतील, असे जिल्हा निवडणूक अधिकारी तथा जिल्हाधिकारी शैलेश नवाल यांनी स्पष्ट केले.
छायाचित्रासह मतदार यादी अद्ययावत करण्याचे कार्य जिल्हा निवडणूक प्रशासनाकडून होत आहे. हे राष्ट्रीय कार्य सुरू असल्यामुळे संबंधित मतदारांनी जिल्हा निवडणूक प्रशासनाला सहकार्य करण्याचे आवाहन करताना नवाल म्हणाले की, ‘नो फोटो व्होटर्स’ची छायाचित्रे मिळवून मतदार यादी निर्दोष करण्यासाठी गावपातळीपासून सर्वत्र प्रयत्न होत आहे. मात्र, अनेक मतदार नमूद पत्त्यावर राहत नसल्याचे आढळले आहे. मतदान केंद्रस्तरीय अधिकाऱ्यांच्या मोहिमेत त्यातील अनेक मतदारांचा शोध लागून छायाचित्रे जमा झाली. मात्र, ७० हजारांपर्यंत मतदारांनी अद्यापही माहिती दिलेली नाही. त्यामुळे पत्त्यांवर न आढळणाऱ्या व प्रतिसाद न देणाऱ्या मतदारांना वगळले जाणार आहे.
पत्त्यांवर न आढळणाऱ्यांबाबत पंचनामेही सुरू
जिल्ह्यातील धामणगाव रेल्वे, बडनेरा, अमरावती, तिवसा, दयार्पूर, मेळघाट, अचलपूर व मोर्शी विधानसभा मतदारसंघातील मतदार याद्या अद्ययावत होत आहेत. त्यासाठी मतदार यादीत छायाचित्र नसलेल्या मतदारांकडून छायाचित्रे मिळवून ते यादीत अद्ययावत करण्यासाठी मतदान केंद्रस्तरीय अधिकारी घरभेटीही देतात. मात्र, अनेकदा मतदार यादीत नमूद पत्त्यावर राहत नसल्याचे आढळून आले आहे. याबाबत पंचनामे करून अशा मतदारांची नावे लोकप्रतिनिधित्व अधिनियम, १९५० व मतदार नोंदणी अधिनियम, १९६० मधील तरतूद व भारत निवडणूक आयोगाच्या मार्गदर्शक सूचनांनुसार वगळण्यात येणार आहेत, अशी माहिती चांदूर रेल्वेचे उपविभागीय अधिकारी इब्राहिम चौधरी यांनी दिली.
मतदार यादीत ज्या मतदारांची छायाचित्रे समाविष्ट नसतील (नो फोटो व्होटर्स) अशा मतदारांची यादी संकेत स्थळावर प्रसिद्ध करण्यात आली आहे. अशा मतदारांची मतदान केंद्रस्तरीय अधिकाऱ्यांकडून पडताळणीही होत आहे. त्यामुळे यादीत छायाचित्र नसलेल्या मतदारांनी १५ जुलैपूर्वी आपली छायाचित्रे मतदान केंद्रस्तरीय अधिकारी किंवा संबंधित तहसील कार्यालय किंवा सहायक मतदार नोंदणी अधिकारी यांच्या कार्यालयात जमा करावीत, असे आवाहन करण्यात आले आहे.