आईच्या कौतुक साेहळ्यात माजी सरन्यायाधीश भूषण गवई आर्वजून उपस्थित; माय-लेकांच्या कौतुक सोहळ्याचा असाही दुर्मिळ योग...

Amravati : २३ फेब्रुवारी वैराग्यमूर्ती संत गाडगेबाबा यांची जयंती. याच दिवशी संत गाडगेबाबा अमरावती विद्यापीठाचा दीक्षांत सोहळ्याचे आयोजन करण्यात येते.

अमरावती: २३ फेब्रुवारी वैराग्यमूर्ती संत गाडगेबाबा यांची जयंती. याच दिवशी संत गाडगेबाबा अमरावतीविद्यापीठाचा दीक्षांत सोहळ्याचे आयोजन करण्यात येते. त्यानुसार गतवर्षी २३ फेब्रुवारी २०२५ रोजी भूषण गवई हे सरन्यायाधीश असताना ते अमरावती विद्यापीठाच्या ४२ व्या दीक्षांत सोहळ्यात प्रमुख अतिथी म्हणून उपस्थित होते. त्यावेळी दीक्षांत सोहळ्यात मुलाचे ‘सर्वेाच्च’ कौतुक बघण्यासाठी डॉ. कमलताई हजर होत्या. तर यंदा साेमवारी अमरावती विद्यापीठाचा ४२ व्या दीक्षांत सोहळ्यात डॉ. कमलताई गवई यांना राज्यशास्त्र विषयात ‘डी.लिट’ सर्वेाच्च पदवीने गौरविण्यात आले. आईच्या या कौतुक साेहळ्यात भूषण गवई हे आर्वजून उपस्थित झाले. खरे तर माय-लेकांच्या कौतुक सोहळ्याचा हा दुर्मिळ योग एकाच तारखेला अमरावती विद्यापीठात अनुभवता आला, हे विशेष.

माजी सरन्यायाधीश भूषण गवई हे अमरावती विद्यापीठात त्यांच्या मातोश्री डॉ. कमलताई गवई यांना ‘डी.लिट’ प्रदान सोहळ्याला उपस्थित राहणार असल्याबाबत दौरा २२ फेब्रुवारी रोजी रात्री ९ वाजता प्रशासनाकडे आला होता. ते विद्यापीठात सकाळी १० ते १२ असे दोन तास हजर राहणार होते. परंतु अमरावतीत विमान ‘लॅडींग’ झाल्यानंतर भूषण गवई हे थेट विद्यापीठातील दीक्षांत सोहळ्यात ११ वाजून ५० मिनिटांनी पोहोचले. मात्र तेथपर्यंत त्यांच्या आई डॉ. कमलताई गवई यांना ‘डी.लिट’ पदवी प्रदान करण्यात आली होती. असे असले तरी आईच्या हाती डी. लिटची पदवी आणि गळ्यात पदवीचा स्कार्फ बघून भूषण गवई यांचे डोळ्यात आनंदाश्रू तरळले. ८४ व्या वर्षी डॉ. कमलताई यांनी राज्यशास्त्र विषयातील वाड्:मय पंडित (डी.लिट) पदवी मिळवून एक नवा विक्रम प्रस्थापित केल्यामुळे अख्ख्ये गवई कुटुंब आनंदाने भारावून गेले होते. यावेळी डॉ. राजेंद्र गवई, किर्ती गवई, भैयासाहेब गवई, धरम अर्जुन, निशाअर्जुन आदी उपस्थित होते.

दोन तास विलंबाने विमान टेक ऑफ

माजी सरन्यायाधीश भूषण गवई हे मुंबई येथून विशेष विमानाने सकाळी ८ वाजून ४० मिनिटांनी अमरावतीत पोहोचणार होेते. मात्र आकाशात दृष्यमानता योग्य नसल्याने गवई यांचे विमान नियोजित वेळेत ‘टेक ऑफ’ करण्यास यंत्रणांनी नकार दिला. कालातंराने आकाश निरभ्र झाल्यानंतर भूषण गवई यांचे विमान तब्बल दोन तास विलंबाने मुंबईहून ‘टेक ऑफ’ झाले. तथापि, नियोजित वेळेनुसार ते दीक्षांत सोहळ्यात उपस्थित राहू शकले नाही.

डॉ. कमलताई गवई यांची आस्थेने विचारपूस आणि कौतुकही

माजी राज्यपाल तथा रिपाईंचे दिवंगत नेते रा.सू. उपाख्य दादासाहेब गवई यांच्या सुविद्य पत्नी डॉ. कमलताई गवई यांना सोमवारी ‘डी.लिट’ने गौरविण्यात आले. भारतीय लष्कराचे माजी प्रमुख जनरल मनोज पांडे आणि अमरावती विद्यापीठाचे कुलगुरू डॉ. मिलिंद बारहाते यांच्या हस्ते त्यांना पदवी प्रदान करण्यात आली. यावेळी मनोज पांडे व डॉ. मिलिंद बारहाते यांनी मातोश्रींची आस्थेने विचारपूस करून त्यांचे कौतुकसुद्धा केले.