मानधनातून कर्ज कपात

अंगणवाडी सेविका व मदतनिसांचे एक महिन्याच्या मानधनातून परस्पर कर्ज कपात केल्याने अंगणवाडी सेविका व मदतनीस आर्थिक संकटात सापडल्या आहेत. शहरी बाल विकास प्रकल्प

अमरावती : अंगणवाडी सेविका व मदतनिसांचे एक महिन्याच्या मानधनातून परस्पर कर्ज कपात केल्याने अंगणवाडी सेविका व मदतनीस आर्थिक संकटात सापडल्या आहेत. शहरी बाल विकास प्रकल्प कार्यालयांतर्गत ३१५ सेविका व मदतनिसांचे मानधन संबंधित पतसंस्थेने कपात केले आहे.

जिल्ह्यात हजारो अंगणवाडी सेविका व मदतनीस आपले कार्य जबाबदारीने पार पाडत आहेत. त्याकरिता प्रशासनाकडून अंगणवाडी सेविकांना प्रत्येकी ४ हजार ५0 तर मदतनिसांना दोन हजार रुपये मानधन देण्यात येते. हे मानधन बालविकास प्रकल्प कार्यालयामार्फत त्या-त्या कर्मचार्‍यांच्या बँक खात्यात जमा केले जाते. या अंगणवाडी सेविका व मदतनिसांना स्थानिक डॉ. बाबासाहेब आंबेडकर शिक्षक सहकारी पतसंस्थेमार्फत कर्ज वाटप करण्यात आले होते. मात्र गेल्या काही वर्षांत विविध कारणांमुळे १५७ अंगणवाडी सेविका व १५८ मदतनिसांनी कर्जाची परतफेड केली नाही.

परिणामी अंगणवाडी सेविका व मदतनीस अशा ३१५ जणांचे ७६ हजार ९१४ रुपयांचे मानधन कपात करण्यात आले आहे. दर महिन्याला देण्यात येणार्‍या मानधनातून एकदम कर्जाची रक्कम कपात केल्याने अंगणवाडी सेविका व मदतनीस आर्थिक सकंटात सापडल्या आहेत. यामध्ये काही अंगणवाडी सेविका व मदतनिसांनी कर्जाची परतफेड केल्याचेही सांगण्यात येत आहे. मात्र पतसंस्थेने थकबाकी काढून त्यांच्याही मानधनात कपात केली आहे. त्यामुळे पतसंस्था आपला मनमानी कारभार करीत असल्याचा आरोप अंगणवाडी सेविका व मदतनिसांनी केला आहे.

तुटपुंजा मानधनावर अंगणवाडी कर्मचारी सेवा देत आहेत. चिमुकल्यांच्या संगोपनासह त्यांच्या व त्यांच्या मातांच्या आरोग्याची जबाबदारी शासनाने त्यांच्यावर सोपविली आहे. यासह राष्ट्रीय कार्यात त्यांची सातत्याने मदत घेतली जाते. महिन्याकाठी त्यांना मिळणार्‍या मानधनाच्या भरोशावर त्या महिन्याभराच्या खर्चाचा हिशेब तयार करतात. (प्रतिनिधी)