लोकमत न्यूज नेटवर्कअमरावती : विधान परिषदेच्या शिक्षक मतदारसंघासाठी विक्रमी ८६.७३ टक्के मतदान झाल्याचे निवडणूक निर्णय अधिकाऱ्यांनी बुधवारी सकाळी जाहीर केले. या वाढीव मतदानाचा कौल कुणाला, याविषयी चांगलीच चर्चा रंगात आलेली आहे. यासोबतच मागील निवडणुकीप्रमाणे यंदाही पसंतीचा दुसरा क्रम निर्णायक ठरणार असल्याचे शिक्षक मतदारांमध्ये बोलले जात आहे.मंगळवारी मतदान झाल्यानंतर रात्री ८ च्या सुमारास निवडणूक निर्णय अधिकारी पीयूष सिंह यांनी मतदान ८२.९१ टक्के झाल्याचा अंदाज व्यक्त केला होता. पाचही जिल्ह्यांतून सर्व मतपेट्या येथील विलासनगरातील सुरक्षा कक्षात जमा करण्यात आल्यानंतर अंतिम मतदारसंख्या निवडणूक निर्णय अधिकाऱ्यांनी जाहीर केली. यानुसार विभागातील एकूण ३५,६२२ मतदारांपैकी २३,१६६ पुरुष व ७,७३० स्त्री मतदार, असे एकूण ३०,८९६ मतदारांनी मतदानाचा हक्क बजावला. मतदानाची ही अंतिम टक्केवारी ८६.७३ आहे. अमरावती जिल्ह्यात ८६३६ (८३.१५ टक्के) मतदान झाले. अकोला जिल्ह्यात ५,४६५ (८४.३४ टक्के), वाशिम जिल्ह्यात ३,४८८ (९१.८४ टक्के), बुलडाणा जिल्ह्यात ६,७३० (८९.१८ टक्के), तर यवतमाळ जिल्ह्यात ६,५७७ (८८.१८ टक्के) मतदान झाले. यामध्ये पुरुष मतदानाचा टक्का ८८.८९ व स्त्री मतदानाचा टक्का ८०.८४ राहिला.
असा ठरणार विजयी मतांचा कोटामतमोजणीसाठी पहिल्या सहा राऊंडमध्ये फक्त एकूण मतपत्रिका मोजल्या जातील व अवैध बाहेर काढल्या जातील. शिल्लक वैध मतपत्रिकांची संख्या भागिले दोन अधिक एक असे विजयी मतांचे सूत्र आहे. यात पहिल्या पसंतीच्या मतांमध्ये कोणत्याही उमेदवाराने कोटा पूर्ण न केल्यास दुसरा पसंतीक्रम मोजला जातो. यात सर्वांत कमी पसंतिक्रम असलेला उमेदवार बाद होतो व त्याच्या मतपत्रिकेवरील दुसऱ्या क्रमांकाची मते त्या-त्या उमेदवाराला दिली जातात.
अशी होणार मतमोजणी येथील विलासनगरातील गोदामात सकाळी ८ वाजता मतमोजणीला सुरुवात होईल. यात एका हॉलमध्ये निवडणूक निर्णय अधिकारी पीयूष सिंह यांच्या नियंत्रणात सात टेबल व दुसऱ्या हॉलमध्ये सहायक निवडणूक निर्णय अधिकारी शैलेश नवाल यांच्या नियंत्रणात सात टेबल राहतील. प्रथम २७ पोस्टल बॅलेटची मोजणी होईल व त्यानंतर सर्व मतपत्रिकांची सरमिसळ केल्यानंतर २५ मतपत्रिकांचे ४० बंडल (१००० मतपत्रिका) याला सहा फेऱ्या लागतील. यानंतर १४ टेबलवर प्रत्येकी एक हजार मतपत्रिकांचे पसंतिक्रम काढले जातील. यालाही तीन फेऱ्या लागतील.
मतमोजणी स्थळी असा असेल पोलीस बंदोबस्तअमरावतीत स्थित विलासनगरातील शासकीय गोदामात शिक्षक मतदारसंघाची गुरुवारी मतमोजणी होणार आहे. त्याअनुषंगाने या भागात चोख पोलीस बंदोबस्त लावण्यात येणार आहे. यात राज्य राखीव पाेलीस दलाची एक तुकडी, पोलीस आयुक्तालयाचे वरिष्ठ पोलीस अधिकारी, चार पोलीस निरीक्षक, १८ पोलीस उपनिरीक्षक, २०० पोलीस कर्मचारी, तर वाहतूक शाखेचे चार अधिकारी, २० पोलीस कर्मचारी व होमगार्ड तौनात राहणार आहेत.
पाया पडल्याने महिला उमेदवाराविरुद्ध गुन्हामतदान केंद्राच्या १०० मीटरच्या आत प्रवेश व मतदान केंद्र परिसरात शिक्षक मतदारांच्या पाया पडून निवडणूक नियमांचे उल्लंघन केल्याप्रकरणी महिला उमेदवाराविरुद्ध शहर कोतवाली पोलिसांनी गुन्हा नोंदविला. ही कारवाई मंगळवारी करण्यात आली. नायब तहसीलदार तथा केंद्राधिकारी म्हणून कार्यरत गोपाल कडू यांनी यासंदर्भात तक्रार नोंदविली. महिला उमेदवारावर पोलिसांनी भादंविचे कलम १३०, लोकप्रतिनिधी अधिनियम १९५१ नुसार गुन्हा दाखल केला. कॅम्प स्थित मतदान केंद्रावर हा प्रकार घडला.