लोकमत न्यूज नेटवर्क
अमरावती : गाडगेनगर ठाणे हद्दीतील नागपुरीगेट परिसरात असलेल्या बेस्ट मल्टिस्पेशालिटी कोविड हॉस्पिटल येथे २२ दिवसांपासून उपचार घेत असलेल्या अचलपूर येथील महिलाचा शुक्रवारी सकाळी ९.३० वाजताच्या सुमारास कोरोनाने मृत्यू झाला. डॉक्टरांच्या हलगर्जीपणामुळे महिला दगावली, असा आरोप नातेवाईकांनी करीत हॉस्पिटलमध्ये कोविड कक्षात जाऊन तोडफोड केली. याप्रकरणी डॉक्टरांविरुद्ध महिलेच्या पतीने गाडगेनगर ठाण्यात तक्रार नोंदविल्याचे पोलिसांनी सांगितले.
शबाना अंजूम (४५, रा. अचलपूर) असे मृतक महिलेचे नाव असून २७ मे रोजी कोरोना पॉझिटिव्ह निघाल्याने बेस्ट हॉस्पिटलमध्ये उपचाराकरिता दाखल करण्यात आले होते. मात्र शुक्रवारी ९.३० वाजताच्या सुमारास महिला दगावली. त्यानंतर दुपारी १ वाजताच्या सुमारास नातेवाईक संतप्त झाले. हॉस्पिटलमध्ये नातेवाईकांनी गर्दी केली. त्यानंतर काही नातेवाईकांनी व सामजिक कार्यकर्यांनी संतप्त होत डॉक्टर सोहेल बारी व हॉस्पिटल प्रशासनावर संताप व्यक्त करीत हॉस्पिटलची तोडफोड केली. पोलिसांना माहिती मिळताच गाडगेनगर व नागपुरी गेट पोलिसांचा ताफा घटनास्थळावर दाखल झाला. तसेच क्युआरटी पथकसुद्धा घटनास्थळावर दाखल झाले. गाडगेनगरचे वरिष्ठ पीआय आसाराम चोरमले, पीआय मोहन कदम व पोलिसांच्या ताफ्याने घटनास्थळावर नियंत्रण मिळविले. नातेवाईकांची समजूत काढून मृतदेह अंत्यसंस्कारासाठी रवाना केला.
२२ दिवसांपासून महिलेवर उपचार सुरू आहे. महिलेची प्रकृती आधीपासूनच चिंताजनक होती. त्यामुळे त्यांना व्हेंटिलेटर लावले होते. आम्ही महिलेला वाचविण्याचे पूर्ण प्रयत्न केले. तोडफोड ही नातेवाईकांनी नाहीतर बाहेरील लोकांनी केली. त्यांच्याविरुद्ध पोलिसात तक्रार नोंदविणार आहे.
- डॉ. सोहेल बारी, संचालक बेस्ट हॉस्पिटल अमरावती
मृताच्या नातेवाईकांनी तक्रार दिली. परंतु, नियमानुसार डॉक्टरांवर गुन्हा नोंदविता येत नाही. सदर प्रकरण जिल्हा शल्यचिकित्सकांच्या समितीकडे पाठविण्यात येईल. रुग्णालयाची तोडफोड केल्याप्रकरणी डॉक्टरांनी तक्रार दिली असून, आठ ते नऊ जणांविरुद्ध गुन्हा नोंदविण्यात येईल.
- आसाराम चोरमले,
वरिष्ठ पोलीस निरीक्षक, गाडगेनगर