सहकारातील स्थगित १४ संस्थांच्या निवडणुकीचा बिगूल

अमरावती : सहकारातील १४ संस्थांच्या निवडणुकीची स्थगिती शासनाने मंगळवारी उठविल्याने बुधवारपासून पुन्हा प्रक्रियेला प्रारंभ होत आहे. कर्जमाफी, कोरोना संसर्ग आदी कारणांमुळे एक वर्षापासून या संस्थांच्या निवडणुकीला स्थगिती देण्यात आलेली होती.

जिल्ह्यात जानेवारी २०२० मध्ये सहकारातील १४ संस्थांच्या निवडणुकीची प्रक्रिया सुरू झालेली होती. मात्र, याच सुमारास कर्जमाफीची प्रक्रिया सुरू झाल्याने या निवडणुकीला आहे त्या टप्प्यावर स्थगिती देण्यात आली होती. त्यानंतर कोरोनाच्या वाढत्या संसर्गामुळे १८ मार्च २०२० च्या आदेशान्वये १७ जून २०२० पर्यंत व १७ जूनच्या आदेशान्वये १६ सप्टेंबरपर्यंत तसेच २८ सप्टेंबरच्या आदेशान्वये ३१ डिसेंबरपर्यंत मुदतवाढ देण्यात आलेली होती. त्यानंतर १६ जानेवारी २०२१ चे आदेश रद्द करून ३१ मार्च २०२१ पर्यंत ही स्थगिती देण्यात आली व हे आदेशदेखील २ फेब्रुवारीला रद्द करण्यात आले. ज्या टप्प्यावर निवडणुका स्थगित करण्यात आल्या होत्या, आता त्या टप्प्यापाासून पुढे प्रक्रिया राबविण्याचे आदेश सहकार विभागाने दिले आहेत. त्यामुळे जिल्ह्यातील १४ सहकारी संस्थांच्या निवडणुकीला बुधवारपासून प्रारंभ होत असल्याची माहिती जिल्हा उपनिबंधक संदीप जाधव यांनी ‘लोकमत’ला सांगितले.

जिल्ह्यातील ६४८ सहकारी संस्थांच्या निवडणुकीला १६ जानेवारीच्या आदेशाप्रमाणे ३१ मार्चपर्यंत स्थगिती देण्यात आली आहे. आता ग्रामपंचायतींची निवडणूक आटोपली. ६४८ सहकारी संस्थांमधील सेवा सहकारी संस्थांच्या निवडणुकीनंतर बाजार समितीच्या निवडणुुका घेण्याचा मार्ग सुकर होणार आहे.

बॉक्स

या संस्थांची बुधवारपासून प्रक्रिया

अभिनंदन को-ऑपरेटिव्ह बँक (अमरावती), पूर्णा अ‍ॅग्रो बायोएजन्सी सहकारी संस्था (चांदूर बाजार), हरताळा सेवा सहकारी सोसायटी, जिल्हा परिषद प्राथमिक शिक्षक व इतर कर्मचारी सहकारी पतसंस्था (वरूड), वरूड संत्रा बागायतदार सहकारी समिती, अमरावती जिल्हा सहकारी बोर्ड, अमरावती जिल्हा ग्रामीण डाकसेवक सहकारी संस्था, हरिसाल आदिवासी विविध कार्यकारी सहकारी संस्था, दुनी आदिवासी विविध कार्यकारी सहकारी संस्था, चाकर्दा आदिवासी विविध कार्यकारी सहकारी संस्था, नांदुरी आदिवासी विविध कार्यकारी सहकारी संस्था,बिजुधावडी आदिवासी विविध कार्यकारी सहकारी संस्था व शिवपूर सेवा सहकारी संस्था (चांदूर बाजार)

कोट

संस्थांच्या निवडणुकीसंदर्भात प्राधिकरणाला प्रस्ताव पाठविण्यात येईल व त्यांचा मान्यतेनंतर लगेच निवडणुकीची प्रक्रिया सुरू करण्यात येईल. या संस्थांची अंतिम मतदार यादी झाली आहे.

- संदीप जाधव, जिल्हा उपनिबंधक (सहकारी संस्था)