बडनेर्‍याच्या पाणी टंचाईचा आमदारांनी घेतला आढावा

बडनेरा येथील नवी वस्ती व जुनी वस्ती तसेच या मतदारसंघातील विविध गावांमध्ये भासत असलेल्या पाणी टंचाईच्या मुद्यावर आ. रवी राणा यांनी मंगळवारी बडनेरा येथे

अमरावती : बडनेरा येथील नवी वस्ती व जुनी वस्ती तसेच या मतदारसंघातील विविध गावांमध्ये भासत असलेल्या पाणी टंचाईच्या मुद्यावर आ. रवी राणा यांनी मंगळवारी बडनेरा येथे पाणी पुरवठा विभागाच्या अधिकार्‍यांची आढावा बैठक घेऊन पाणी टंचाई निवारणार्थ उपाययोजना करण्याचे निर्देश दिले.

बडनेरा शहरासह ग्रामीण भागात पाणी टंचाई भासत असल्याने नागरिकांची डोकेदुखी वाढली आहे. बडनेरा येथील नवीवस्ती, जुनीवस्ती येथे एक दिवसाआड पाणी पुरवठा होत असून काही भागात पाणी पुरवठा सुरळीत होत नसल्याने पाणी टंचाईची समस्या शहरात गंभीर बनली आहे त्यामुळे ही पाणी टंचाई निवारणार्थ तातडीने उपाययोजना कराव्यात तसेच बडनेरा येथील नवीन पाणी टाकीच्या बांधकामास शासनाकडून मंजुरात घेऊन हा प्रश्न निकाली काढण्यासंदर्भात शासनाकडे पाठपुरावा करावा अश्या सूचना राणा यांनी अधिकार्‍यांना दिल्या असून यासाठी स्वत: प्रयत्न करणार असल्याचे त्यांनी सांगितले. याशिवाय बडनेरा मतदारसंघातील अंजनगाव बारी परिसरातील गावांमध्येही पाणी टंचाईची समस्या निर्माण झाल्यामुळे विहीर अधिग्रहण, नादुरूस्त असलेले हँडपंप दुरूस्त करून तातडीने व्यवस्था करावी, बोडणा, भानखेडा, हातला, अमडापूर, इंदला, घातखेडा, कस्तुरा मोगरा, काटआमला, लोणटेक, मलकापूर, मासोद, राजूरा, पार्डी, पिंपळखुटा आदी गावातीलही पाणी टंचाईच्या समस्या निवारण्यासाठी अधिकार्‍यांनी स्वत: दौरे करून उपाययोजना कराव्यात. यावेळी आमदारांनी जीवन प्राधिकरण व जिल्हा परिषद पाणी पुरवठा विभागाकडून पाणी टंचाईची माहिती जाणून घेतली. यावेळी मजिप्राचे अधिकारी प्रशांत भांबरे, सोनारे, नवताळे, जि. प. पाणी पुरवठा विभागाच्या अधिकारी श्‍वेता बॅनर्जी, तहसीलदार बागडे, गटविकास अधिकारी प्रमोद कापडे, मेश्राम तसेच विविध विभागाचे खातेप्रमुख, नगरसेवक व ग्रामस्थांनी उपस्थिती होती. (प्रतिनिधी)