सीसी कॅमेर्‍यांची ‘लर्निंग लायसन्स्’वर नजर

वाशिम उपप्रादेशिक परिवहन कार्यालयात गत १५ दिवसात १८३ पैकी केवळ ६८ शिकाऊ चालक उत्तीर्ण झाले आहेत.

वाशिम: प्रादेशिक व उपप्रादेशिक परिवहन कार्यालयांमधील ‘लर्निंग लायसन्स्’ची प्रणाली सीसी कॅमेर्‍याच्या नजरेखाली आणून परिवहन विभागाने मानवी हस्तक्षेपाला चाप बसविण्याच्या दिशेने पहिले पाऊल टाकले आहे. संगणकीय चाचणीतून उत्तीर्ण होणार्‍यांचा आकडा अल्प असल्याने बोगस चालकांबरोबरच ‘दलाली’लादेखील नियंत्रणात आणण्याचे प्रयत्न तूर्तास तरी यशस्वी होताना दिसत आहे. एकट्या वाशिम उपप्रादेशिक परिवहन कार्यालयात गत १५ दिवसात १८३ पैकी केवळ ६८ शिकाऊ चालक उत्तीर्ण झाले आहेत.
शिकाऊ चालकांना लर्निंग लायसन्स (शिकाऊ अनुज्ञप्ती) देताना गैरप्रकार होत असल्याच्या तक्रारी परिवहन आयुक्तांकडे गेल्या होत्या. या पृष्ठभूमीवर लर्निंग लायसन्स प्रक्रियेतील मानवी हस्तक्षेप टाळणे आणि कामकाजात पारदर्शकता आणण्याचा प्रयत्न म्हणून महाराष्ट्र शासनाच्या परिवहन विभागाने ११ मार्च २0१४ रोजी एक आदेश पारित केला. यानुसार प्रत्येक प्रादेशिक व उपप्रादेशिक परिवहन कार्यालयातील लर्निंग लायसन्सच्या प्रक्रियेला तंत्रज्ञानाची जोड देण्याचे बंधन टाकण्यात आले. सीसीच्या नजरेखाली शिकाऊ चालकांची संगणकीय चाचणी घेण्याचे निर्देश परिवहन आयुक्तांनी दिले होते.