‘आयटीआय’च्या विद्यार्थ्यांना नाकारली ‘एसटी’ पासची सवलत

विद्यार्थ्यांना नाहक भूर्दंड; २0 किमी पेक्षा कमी अंतरावर पास देण्यास नकार.

अकोला : शासकीय औद्योगिक प्रशिक्षण संस्थेच्या (आयटीआय) विद्यार्थ्यांना एसटी महामंडळाने २0 किलोमीटर अंतरातील प्रवासाकरिता शैक्षणिक सवलतीची पास नाकारल्याने त्यांना शैक्षणिक सवलतीपासून वंचित राहावे लागत आहे. तर दुसरीकडे यावर पर्याय म्हणून खासगी पास काढण्याचा सल्लादेखील एसटी महामंडळाच्या कर्मचार्‍यांकडून देण्यात येत असल्याने विद्यार्थ्यांंना अधिक पैसे मोजावे लागणार आहेत. महाराष्ट्र राज्य परिवहन महामंडळाच्यावतीने विद्यार्थ्यांना प्रवासामध्ये शैक्षणिक सवलत देण्यात येत असल्याने ग्रामीण भागातील विद्यार्थी एसटीच्या प्रवासाला पसंती देतात. शाळा, महाविद्यालये सुरू झाल्याने एसटी पासकरिता बस स्थानकावर विद्यार्थ्यांंची गर्दी वाढली आहे. यामध्ये शहरालगतच्या ग्रामीण भागातील तसेच आयटीआयच्या विद्यार्थ्यांंची संख्या अधिक आहे. परंतु, यंदा राज्य परिवहन महामंडळातर्फे आयटीआय आणि टंकलेखन (टाइपिंग) प्रशिक्षण घेणार्‍या विद्यार्थ्यांंना २0 किलोमीटरपेक्षा कमी प्रवासासाठी शैक्षणिक सवलत नाकारण्यात आली आहे. एवढेच नाही, तर खासगी पास काढण्याचे सल्लेदेखील एसटी महामंडळाच्या कर्मचार्‍यांकडून देण्यात येत आहेत. त्यामुळे विद्यार्थ्यांंना एसटी पास काढण्यासाठी अधिक पैसे मोजावे लागत आहेत. या संदर्भात आयटीआयच्या काही विद्यार्थ्यांंनी बस स्थानक व्यवस्थापकांची भेट घेऊन पास मिळत नसल्याचे सांगितले. या संदर्भात आयटीआयच्या विद्यार्थ्यांंचे गाव २0 किलोमीटरच्या आत असेल तर, अशा विद्यार्थ्यांंना पास देण्याचे आदेश वरिष्ठांनी दिले नसल्याचे बस स्थानक व्यवस्थापकांनी यावेळी विद्यार्थ्यांंना सांगितले. आयटीआयच्या विद्यार्थ्यांंना शैक्षणिक सवलतीपासून डावलण्यात येत असल्याने त्यांना शैक्षणिक प्रवासाच्या सवलतीपासून वंचित राहावे लागत असून, विद्यार्थ्यांंमध्ये चिंतेचे वातावरण पसरले आहे.