बनावट गुंठेवारी प्रकरण; सहाय्यक नगर रचनाकारांचे बयाण

प्रस्तावावरील स्वाक्षरी बनावट

अकोला : महापालिकेतील नगर रचना विभाग व उपविभागीय कार्यालयातून तयार करण्यात आलेल्या बनावट गुंठेवारी प्रस्तावप्रकरणी मनपाचे तत्कालीन प्रभारी सहाय्यक नगर रचनाकार आर.एन. साबळे यांचे बयाण शुक्रवारी रात्री सिटी कोतवाली पोलिसांनी नोंदवले. प्रस्तावावरील स्वाक्षरी बनावट असल्याची माहिती साबळे यांनी पोलिसांना दिली.
वाशिम बायपास परिसरातील शेत सर्व्हे नं.४२/१ मधील तीन एकर जागेचा गुंठेवारी प्रस्ताव बनावट असल्याची तक्रार भारिप-बमसंचे गटनेता गजानन गवई यांनी आयुक्त डॉ.महेंद्र कल्याणकर यांच्याकडे केली होती. पूर्वाश्रमीच्या शेतमालक पुष्पाबाई वसंतराव औतकर तर्फे गोविंद शंकरलाल बजाज यांच्या नावाने गुंठेवारीचा प्रस्ताव मनपाच्या परवानगीशिवाय मंजूर झाल्याची धक्कादायक बाब उजेडात आली. सदर प्रस्ताव नगर रचना विभागाकडे सादर केल्यानंतर दुसरीकडे या प्रस्तावाला उपविभागीय अधिकारी कार्यालयातून मंजुरी मिळाल्याने दोन्ही शासकीय कार्यालयांची फसवणूक झाली. मनपाकडून हा प्रस्ताव मंजूर करण्यात आला, त्या कालावधीत मनपाच्या नगर रचना विभागाचा प्रभार सहाय्यक नगर रचनाकार आर. एन. साबळे यांच्याकडे होता. प्रस्तावावर आर.एन. साबळे यांच्यादेखील स्वाक्षरी असल्याने यासंदर्भात प्रभारी सहाय्यक नगर रचनाकार साबळे यांच्यासह पूर्वाश्रमीच्या शेतमालक पुष्पाबाई औतकर यांना लेखी खुलासा सादर करण्याचे निर्देश आयुक्तांनी दिले होते. यावर तत्कालीन सहाय्यक नगर रचनाकार आर.एन. साबळे यांनी मंजूर प्रस्तावावरील त्यांच्या स्वाक्षरी बनावट असल्याचे मनपाकडे नमूद केले. या प्रकरणी मनपाकडून सिटी कोतवाली पोलिसात फौजदारी तक्रार नोंदवल्यानंतर पोलिसांनी गुन्हा दाखल केला. यामध्ये प्रस्तावावर मनपाचे तत्कालीन सहाय्यक नगर रचनाकार आर.एन.साबळे यांच्या स्वाक्षरी असल्याने त्यांचे बयाण नोंदवण्यात आले. यावेळी प्रस्तावावरील सर्व स्वाक्षरी बनावट असल्याची माहिती साबळे यांनी पोलिसांना दिली.