अकोल्यात निवृत्त अभियंत्याची धारदार शस्त्राने हत्या; मृत व्यक्तीच्याच इमारतीमध्ये राहत होता आरोपी

अकोल्यात माजी अभियंत्याची निर्घृणपणे हत्या करण्यात आल्याने खळबळ उडाली आहे.

Akola Crime: काँग्रेस नेत्याच्या भावाच्या हत्येने अकोल्यात खळबळ उडाली आहे. जामीनावर बाहेर आलेल्या एका गुंडाने माजी अभियंता असलेल्या व्यक्तीची भररस्त्यात धारदार शस्त्राने हल्ला करुन हत्या केली. जुन्या वादातून हा सगळा प्रकार घडला असल्याचे म्हटलं जात आहे. मात्र ही संपूर्ण घटना एका सीसीटीव्हीमध्ये कैद झाली असून त्याचे फुटेज व्हायरल होत आहे. या सगळ्या प्रकारामुळे परिसरात दहशतीचे वातावरण निर्माण झालं असून पोलीस या प्रकरणाचा सखोल तपास करत आहेत.

सोमवारी रात्री अकोल्यातील रणपिसे नगर येथील मुरलीधर टॉवर येथे ६० वर्षीय निवृत्त अभियंता संजय कौशल यांची निर्घृण हत्या करण्यात आली. या  थरारक हत्याकांडानंतर परिसरात खळबळ उडाली. संजय कौशल हे अकोल्यातील काँग्रेसचे जेष्ठ नेते विजय कौशल यांचे लहान बंधू असून ते सार्वजनिक बांधकाम विभागात अभियंते म्हणून निवृत्त झाले होते. मिळालेल्या माहितीनुसार, ही हत्या महेंद्र विश्वासराव पवार नावाच्या व्यक्तीने संजय कौशल यांची हत्या केली. महेंद्र पवार हा सराईत गुन्हेगार असून एका प्रकरणात जामीनावर बाहेर असतानाच त्याने कौशल यांची हत्या केली.

सोमवारी रात्री साडेआठच्या सुमारास आरोपी महेंद्र पवार याने संजय कौशल यांच्या छातीवर आणि डोक्यावर धारदार लोखंडी शस्त्राने हल्ला केला आणि त्यांना जागीच ठार केले. या भयानक घटनेचा व्हिडिओ जवळच्या सीसीटीव्ही कॅमेऱ्यात कैद झाला होता. त्याच्या मदतीने पोलिसांनी काही तासांतच आरोपीला अटक केली. घटनेची माहिती मिळताच अकोला शहर पोलीस घटनास्थळी दाखल झाले आणि त्यांनी तपास सुरु केला. घटनास्थळी मोठा पोलिस बंदोबस्त तैनात करण्यात आला होता. दोन विशेष पोलिस पथकांनी आरोपीचा शोध घेऊन त्याला अटक केली.

दरम्यान, आरोपी महेंद्र पवार हा यापूर्वीही खुनी हल्ला आणि गंभीर गुन्ह्यांमध्ये सहभागी असल्याचे समोर आलं आहे. नुकतेच त्याला कोर्टातून एका प्रकरणातून जामिनावर सोडण्यात आले होते. महत्त्वाचे म्हणजे मृत संजय कौशल आणि आरोपी पवार दोघेही मुरलीधर टॉवरमध्ये राहत होते. या हत्येमागील खरे कारण अद्याप स्पष्ट झालेले नसले तरी जुन्या वादातून हा प्रकार घडल्याचे म्हटलं जात आहे. पोलीस या प्रकरणाचा सर्व बाजूंनी तपास करत आहेत.