खंडाळ्यात पुन्हा घरफोडी

हिवरखेड पोलिस स्टेशनअंतर्गत खंडाळा येथे चोर्‍यांचे सत्र सुरूच असून, अज्ञात चोरट्यांनी सोमवारी रात्री एका घरात प्रवेश करून २० हजारांचा ऐवज लंपास केला.

२० हजारांचा ऐवज लंपास
खंडाळा : हिवरखेड पोलिस स्टेशनअंतर्गत खंडाळा येथे चोर्‍यांचे सत्र सुरूच असून, अज्ञात चोरट्यांनी सोमवारी रात्री एका घरात प्रवेश करून २० हजारांचा ऐवज लंपास केला. याप्रकरणी हिवरखेड पोलिसांनी अज्ञात चोरट्याविरुद्ध गुन्हा दाखल केला आहे.
पोलिस सूत्रानुसार, अज्ञात चोरट्यांनी सोमवारी रात्री खंडाळा येथील संतोष भेंडे यांच्या घरात प्रवेश केला. कपाट फोडून रोख २० हजार रुपये लंपास केले. दरम्यान, चोरट्यांनी भेंडे यांच्या घरी शेवयावरही ताव मारल्याची माहिती भेंडे यांनी दिली.
खंडाळा गावात एका महिन्यामध्ये पाच ते सहा ठिकाणी घरफोड्या करून लाखोंचा ऐवज लंपास केला. या प्रकारामुळे गावामध्ये भीतीचे वातावरण निर्माण झाले आहे. पोलिस प्रशासनाचा वचक राहिला नसल्यामुळे चोरट्यांची हिंमत वाढल्याच्या प्रतिक्रिया ग्रामस्थांकडून व्यक्त केल्या जात आहेत. (वार्ताहर)

ग्राम सुरक्षा दलाची स्थापना
खंडाळा : स्थानिक खंडाळा येथे झालेल्या चोर्‍यांची दखल घेत हिवरखेड पोलिसांनी गावातील नागरिकांची सभा घेऊन यामध्ये ग्राम सुरक्षा दलाची स्थापना करण्यात आली. यामध्ये प्रत्येक रात्री ४ सुरक्षा रक्षक व एक पोलिस कर्मचारी यांनी गावामध्ये गस्त घालून गाव संरक्षण करावे. या कार्यक्रमाला सरपंच सुरेश जाधव, माजी सरपंच बलवंत सांगुनवेढे, गणपत सांगुनवेढे, ग्रा. पं. सदस्य दिनेश खंडेराव, मनोहर किनेकर, डॉ. वर्मा, प्रकाश खंडेराव, ठाणेदार अनंत पूर्णपात्रे, पोउनि. सूर्यवंशी, बिट जमादार दादाराव लिखार, हेकाँ. नागोराव भांगे, देशमुख व नागरिक उपस्थित होते.