दोन प्रतिष्ठानांविरुद्ध गुन्हा दाखल
मास्क न घालणे, सोशल डिस्टन्सिंग न पाळणे भोवले
लोकमत न्यूज नेटवर्क
अकोला : शहरासह जिल्ह्यात कोरोनाचा पादुर्भाव मोठ्या प्रमाणात वाढत असताना आता प्रशासनाने मास्क न घालणारे तसेच सोशल डिस्टन्सिंग न पाळणार्यांवर कारवाईचा बडगा उगारला आहे. शहर पोलीस उपअधीक्षक सचिन कदम, परिविक्षाधीन पोलीस उपअधीक्षक अमर ठाकूर व सिटी कोतवालीचे ठाणेदार उत्तम जाधव यांनी बुधवारी शहराच्या विविध भागात कारवाई करत सुमारे २५७ मास्क न घालणाऱ्या दुचाकीस्वारांवर दंडात्मक कारवाई केली. त्यानंतर सिटी कोतवाली पोलीस ठाण्याच्या हद्दीतील दोन दुकानदारांनी सोशल डिस्टन्सिंगचे पालन न केल्याने त्यांच्यावरही गुन्हा दाखल करण्यात आला आहे.
जिल्ह्यात कोरोनाचे रुग्ण मोठ्या प्रमाणात वाढत असतानाही शहरात मात्र त्याचे काहीही गांभीर्य नसल्याचे दिसून येत आहे. दररोज कोरोनाचे १५० ते २०० रुग्ण सापडत आहेत. त्यामुळे हा धोका अधिक वाढत असताना जिल्हाधिकारी जितेंद्र पापळकर यांनी जमावबंदी आदेश लागू केले आहेत; मात्र त्यानंतरही शहरात प्रचंड गर्दी होत असल्याचे वास्तव आहे. त्यामुळे शहर पोलीस उपअधीक्षक सचिन कदम, ठाणेदार उत्तम जाधव यांनी सिटी कोतवाली पोलीस ठाण्याच्या हद्दीत सर्वाधिक म्हणजेच १९९ मास्क न घालणाऱ्या दुचाकीस्वारांवर दंडात्मक कारवाई केली. त्यानंतर टिळक रोडवरील सुनील फॅशन ड्रेसेसचे मालक आनंद हरीमला अडवाणी, ताजना पेठ येथील रामाणी ब्रदर्स निरमा शिलाई मशीनचे मालक संतोष प्रकाशलाल रामाणी यांच्याविरुद्ध जिल्हाधिकाऱ्यांच्या आदेशाचे उल्लंघन केल्याप्रकरणी गुन्हा दाखल केला आहे. या दोन्ही दुकानात सोशल डिस्टन्सिंग पाळण्यात येत नसल्याचे पोलिसांच्या निदर्शनाला आल्यानंतर ही कारवाई करण्यात आली. शहरातील वाढणारी कोरोना रुग्णांची संख्या कमी करण्यासाठी आता पोलीस प्रशासनाने कंबर कसली असून, मास्क न घालणारे तसेच सोशल डिस्टन्सिंग न पाळणाऱ्यांवर कारवाई सुरू केली आहे. हे कारवाईचे सत्र गुरूवारपासून अधिक कठोरपणे राबविण्यात येणार असल्याची माहिती सिटी कोतवालीचे ठाणेदार उत्तम जाधव यांनी दिली.
शहरातील कोणत्याही दुकानात चहा टपरी, पान टपरी तसेच गर्दीच्या ठिकाणांवर सोशल डिस्टन्सिंगचे पालन करणे व मास्क घालणे बंधनकारक करण्यात आले आहे. कोरोनाचा उद्रेक होत असतानाच त्यावर नियंत्रण मिळवण्यासाठी प्रशासनाकडून कठोर पावले उचलण्यात येत आहेत. मात्र, जे नागरिक या नियमाचा भंग करतील, त्यांच्यावर पोलीस प्रशासनाकडून कठोर कारवाई करण्यात येणार आहे. गुरुवारपासून ही कारवाई अधिक तीव्र होणार आहे. त्यामुळे नागरिकांनी नियमांचे पालन करून प्रशासनाला सहकार्य करावे.
- सचिन कदम
शहर पोलीस उपअधीक्षक, अकोला.