भेसळयुक्त खाद्य पदार्थ विकणार्‍यांना अभय

अस्वच्छ अथवा भेसळयुक्त पदार्र्थ विकणार्‍यांवर ठोस कारवाई करण्यात अन्न व औषध प्रशासनाची टाळाटाळ !

निंबा फाटा (अकोला): अस्वच्छ अथवा भेसळयुक्त पदार्र्थ विकणार्‍यांवर ठोस कारवाई करण्यात अन्न व औषध प्रशासन टाळाटाळ करीत असल्याचे दिसत आहे. शहर व ग्रामीण भागातील हॉटेल्सची तपासणी करणे व नमुने तपासणीसाठी पाठवून हॉटेल्स व्यावसायिकांवर कावाई करण्याचे काम अन्न व औषध विभागाचे आहे; परंतु ग्रामीण भागात सर्रास रस्त्यावर खाद्य पदार्थांची विक्री होत आहे. तसेच पदार्थ काढण्यासाठी हलक्या प्रतीचे तेल वापरण्यात येत आहे, हे माहीत असताना हॉटेल्स मालकावर हा विभाग मेहेरबान झाला आहे. भेसळयुक्त पदार्थाची विक्री होत असल्याची ओरड झाल्यास थातूरमातूर कारवाई केली जाते; परंतु शेकडो हॉटेल्सची तपासणीच झाली नसल्याचे समजते. बाळापूर तालुक्यातील पारस, निंबा फाटा, बाळापूर, उरळ या गर्दीच्या ठिकाणी रस्त्यावर खाद्य पदार्थांची विक्री सुरू आहे. हॉटेल्सच्या परिसरात असलेली अस्वच्छता, उघड्यावर पदार्थांची विक्री आदींवर दंडात्मक कारवाईचे अधिकार तालुका स्तरावर पालिकेच्या आरोग्य अधिकार्‍यांनाही आहेत. नगर पालिका व अन्न व औषध प्रशासन विभाग यांच्यात लागेबांधे असल्यामुळे सर्वकाही आलबेल असल्याचे दाखविण्यात येत आहे.