श्रीगोंदा : दीड महिन्यांपासून कुकडी प्रकल्पातील धरणाच्या पाणलोट क्षेत्राकडे पाठ फिरवली होती. मात्र, दोन दिवसांपासून लाभक्षेत्रात पावसाची संततधार सुरू आहे. त्यामुळे उभ्या पिकांना दिलासा मिळणार आहे. सध्या प्रकल्पात १७ हजार ९१३ एमसीएफटी म्हणजेच ६० टक्के इतका उपयुक्त पाणीसाठा आहे. गेल्या वर्षीच्या तुलनेत यंदा अवघा ८ टक्के अधिक पाणीसाठा आहे. गेल्या वर्षी १५ हजार ५२२ एमसीएफटी इतका उपयुक्त पाणीसाठा होता.
सध्या कुकडी प्रकल्पात ६० टक्के पाणीसाठा आहे. यामध्ये डिंभे धरणात ११ हजार १०० एमसीएफटी पाणी आहे. बाकी सर्व धरणात अवघे सात हजार एमसीएफटी पाणी आहे. त्यामुळे भविष्यात कुकडी लाभक्षेत्रात भयानक अवस्था निर्माण होण्याची शक्यता आहे. गेल्या दीड महिन्यापासून पाणलोट क्षेत्रात पाऊस थंडावला आहे. त्यामुळे धरणातील पाणीसाठ्यात अपेक्षित वाढ झालेली नाही. प्रकल्पातील येडगाव धरण ओव्हरफ्लो झाले होते. मात्र, धरणातून १ हजार ४०० क्युसेकने आवर्तन सोडले आहे. त्यामुळे येडगावातील पाणीसाठा ४९ टक्के झाला आहे. पाणलोट क्षेत्रात पाऊस न आल्यास येडगावमधून सुरू असलेले आवर्तनही बंद होईल. घोड धरणात १ हजार २५९ एमसीएफटी २६ टक्के पाणीसाठा झाल्यानंतर लाभक्षेत्रासाठी आवर्तन सोडण्यात आले होते. त्यामुळे घोड धरणातील साठाही ६ टक्क्यांनी कमी झाला आहे.
----
कुकडी प्रकल्पातील धरणनिहाय पाणीसाठा
येडगाव ९४९ एमसीएफटी ४९ टक्के, माणिकडोह ४ हजार ३१२ एमसीएफटी ४२ टक्के, वडज ५९२ एमसीएफटी ५० टक्के, डिंभे ११ हजार १०० एमसीएफटी ८९ टक्के, पिंपळगाव जोगे ९५१ एमसीएफटी २४ टक्के, घोड १ हजार २५९ एमसीएफटी २६ टक्के, विसापूर ३१ एमसीएफटी ४ टक्के, सीना ५०६ एमसीएफटी २७ टक्के, खैरी ३० एमसीएफटी ६ टक्के.