शिरसगाव प्राथमिक शाळेत सौर अभ्यासिकेचे धडे!

रियाज सय्यद, संगमनेर आदिवासी... शिरसगाव जिल्हा परिषद प्राथमिक शाळेने आदिवासी विद्यार्थी संगणक व डिजिटल ज्ञानदानाचे धडे गिरवू लागले आहेत.

रियाज सय्यद, संगमनेर आदिवासी... अतिदुर्गम... डोंगराळ... खडकाळ माळरानावरच्या शिरसगाव जिल्हा परिषद प्राथमिक शाळेने लोकसहभागातून साकारलेल्या सौर अभ्यासिकेत आदिवासी विद्यार्थी संगणक व डिजिटल ज्ञानदानाचे धडे गिरवू लागले आहेत. शंभर टक्के भारनियमनमुक्त शाळेने आदर्श निर्माण केला आहे. शिरसगाव(ता. संगमनेर) प्राथमिक शाळेत इयत्ता पहिली ते पाचवीच्या वर्गात शिकणाऱ्या ३७ विद्यार्थ्यांची संख्या शंभर टक्के आदिवासी आहे. आदिवासी विद्यार्थ्यांपर्यंत आधुनिक तंत्रज्ञान पोहचावे, या उद्देशाने मुख्याध्यापक सुनील वाडेकर व शिक्षक अरूण कासार यांनी पुढाकार घेतला. शिक्षकांची जिद्द व तळमळ पाहून ग्रामस्थांनी लोकसहभागातून सुमारे ४ लाख ५० हजार रुपयांचा निधी जमा केला. ग्रामीण भागात सततचे भारनियमन, वादळ, पावसाळ्यात नेहमी गायब होणारी वीज यामुळे शाळा संगणकीकृत, डिजिटल असूनही त्याचा फारसा उपयोग होत नव्हता. शाळेतील मोलामहागाची संगणकीकृत व डिजिटल उपकरणे धूळखात पडू लागल्याचे शिक्षकांच्या लक्षात आले. विद्यार्थ्यांच्या ज्ञानार्जनासाठी त्यांचा उपयोग व्हावा, यासाठी शिरसगाव शाळेने ग्रामस्थांच्या लोकसहभागातून सौर ऊर्जा निर्मितीचा अभिनव प्रयोग केला. शाळा संगणकीकृत व डिजिटलायजेन करण्यासाठी ७ संगणक, १ प्रोजेक्टर, २ पॅनल, २ बॅटऱ्या, १ चार्ज कंट्रोलर, १ इव्हर्टर अशी मोलामहागाची तांत्रिक उपकरणे बसविण्यात आली. सौर ऊर्जा प्रकल्पाच्या माध्यमातून दररोज ७५० वॅट वीज निर्मिती होवू लागली अणि बघता-बघता शाळेत सौर उर्जेचा लटलखाट झाला. शाळेतील विद्यार्थ्यांना आधुनिक तंत्रज्ञान आत्मसात करता यावे, म्हणून सहा संगणकाद्वारे ‘एन-कॉम्प्युटींग’ प्रणाली जोडून विद्यार्थ्यांना संगणकाचा बेसीक तर एका संगणकावर सॉफ्टवेअरद्वारे अभ्यासक्रम शिकविला जातो. सौर अभ्यासिकेत पहिली ते पाचवीचे आदिवासी विद्यार्थी शिक्षणाचे धडे गिरवतात. कुठलेही भारनियमन नाही, वीज बील नाही, पूर्ण दाबाने मिळणारी वीज कोणत्याही उपकरणास हानीकारक नाही. जि. प.चे मुख्य कार्यकारी अधिकारी शैलेश नवाल यांच्या ‘सौर शाळा-सौर अभ्यासिका’ या उपक्रमाचा एक भाग म्हणून शिरसगाव शाळा भारनियमनमुक्त होवून सौरऊर्जा निर्मितीचे केंद्र बनले आहे. अतिदूर्गम आदिवासी शाळेच्या या सौर अभ्यासिका उपक्रमाने शिक्षण क्षेत्रात वेगळा ठसा उमटविला आहे. (प्रतिनिधी)