पतसंस्थांमध्ये १३२ खात्यांना भोंदू अशोक खरात वारसदार; चाकणकर नावाचेही खाते, ६० कोटींचा व्यवहार

सर्व खात्यांना खरातचा मोबाइल क्रमांक संलग्न

शिर्डी: पतसंस्थांमध्ये वेगवेगळ्या लोकांच्या नावे खाते उघडून या खात्यांवर भोंदूबाबा अशोक खरात हा व्यवहार करत होता हा खळबळजनक प्रकार पोलिस तपासात समोर आला आहे. विशेष म्हणजे या सर्वच खात्यांचा वारसदार अशोक खरात असल्याचीही माहिती आहे. यात प्रतिभा चाकणकर व त्यांच्या मुलीच्याही नावाचे खाते असल्याची माहिती आहे.

खरात हा सावकारीचे काम करून लोकांच्या जमिनी स्वतःच्या नावावर करत होता. यातील अनेक व्यवहार हे समता व जगदंबा या दोन पतसंस्थांच्या माध्यमातून झाले आहे. त्यामुळे पोलिसांनी या पतसंस्थांना पत्र देऊन खात्यांची माहिती मागवली आहे. कोपरगाव येथील समता नागरी सहकारी पतसंस्थेच्या राहाता शाखेत एकूण ५७ खातेदारांनी १०० खाती उघडली आहेत. या प्रत्येक खात्याला नॉमिनी (वारसदार) म्हणून अशोक खरात याचे नाव असल्याची माहिती आहे.

या खात्यांवर सुमारे ६० कोटी रुपयांचा व्यवहार झाला आहे. यामध्ये आठ खाती ही खरात कुटुंबीयांची आहेत. यामध्ये चाकणकर नावाचेही खातेदार असल्याची माहिती समोर येत आहे. विशेष म्हणजे या सर्व खात्यांशी अशोक खरात याचा मोबाइल नंबर जोडलेला आहे.

खरातच्या पत्नीला लूकआऊट नोटीस 

अशोक खरात व त्याची पत्नी कल्पनाविरुद्ध सावकारी व जमीन बळकावल्याप्रकरणी शिर्डीत गुन्हा दाखल झाला आहे. कल्पना पळून जाऊ नये म्हणून पोलिसांनी लूकआऊट नोटीस जारी केली असल्याची माहिती अधिकृत सूत्रांनी दिली.

'त्या' चाकणकर कोण? 

खरात वारसदार असलेली खाती कुणाच्या नावे आहेत याबाबत पोलिसांना विचारले असता त्यांनी नावे सांगण्यास नकार दिला. मात्र प्रतिभा चाकणकर व आणखी एक चाकणकर अशा दोन नावांनी खाते असल्याची माहिती आहे. महिला आयोगाच्या माजी अध्यक्षा रुपाली चाकणकर यांच्या बहिणीचेही नाव प्रतिभा आहे.

'सर्व खाती कायदेशीर' 

समता पतसंस्थेचे संचालक संदीप कोयटे म्हणाले, ही सर्व खाती कायदेशीर होती. पतसंस्थेत एक लाख दहा हजार खातेदार असल्याने काही खात्यांना एकच नॉमिनी असेल तर ते लक्षात येत नाही.