जानकु लिंबाजी दुधवडे (वय २२, रा. गाढवलोळी, अकलापूर), संजय निवृत्ती दुधवडे ( रा. गाढवलोळी, अकलापूर), दत्तू बुधा केदार(वय १९, रा. नांदुर खंदरमाळवाडी), राजू सुरेश खंडागळे (वय २५, रा. माळवाडी) अशी अटक करण्यात आलेल्या चौघांची नावे आहेत. भाऊ लिंबा दुधवडे (२५, रा. गाढवलोळी) हा फरार झाला आहे.
पोलीस हेड कॉन्स्टेबल संजय विखे, पोलीस नाईक गणेश लोंढे, पोलीस कॉन्स्टेबल किशोर लाड हे बुधवारी पहाटेच्या वेळी गस्त घालत असताना माळवाडी (बोटा) परिसरात दरोडा टाकण्याच्या तयारीत असलेली पाचजणांची टोळी संशयास्पदरीत्या मिळून आली. पोलिसांनी त्यांना ताब्यात घेण्याचा प्रयत्न केला असता त्यांनी पोलिसांवर सत्तूराने हमला व दगडफेक करून पळून जाण्याचा प्रयत्न केला. यावेळी पोलीस कॉन्स्टेबल हरिचंद्र बांडे, प्रमोद चव्हाण, संतोष फड यांनी तत्काळ घटनास्थळी धाव घेतली. पोलीस पथकाने त्यातील चौघांना अटक केली असून, एकजण पसार झाला आहे. अटक केलेल्या आरोपींना न्यायालयासमोर हजर केले असता न्यायालयाने तीन दिवसांची (२३ जुलैपर्यंत) पोलीस कोठडी सुनावली असल्याचे पोलीस उपनिरीक्षक धीरज राऊत यांनी सांगितले.
पोलीस नाईक गणेश लोंढे यांनी दिलेल्या फिर्यादीवरून वरील पाचजणांवर गुन्हा दाखल करण्यात आला. पुढील तपास पोलीस निरीक्षक सुनील पाटील यांच्या मार्गदर्शनाखाली पोलीस उपनिरीक्षक धीरज राऊत हे करीत आहेत.