नगर तालुक्यात ५६ गावांसाठी आज मतदान

केडगाव : नगर तालुक्यातील ५६ गावांसाठी शुक्रवारी (दि.१५) मतदानाची प्रक्रिया पार पडणार आहे. निंबळक, बुऱ्हाणनगरसह दरेवाडी व इतर काही गावात निवडणूक आयोगाचे विशेष लक्ष राहणार असून सर्वत्र पोलीस बंदोबस्त तैनात करण्यात आला आहे. तीन भरारी पथकांची स्थापना करण्यात आली आहे.

५६ गावातील १९९ प्रभागात २१९ मतदान केंद्राची निर्मिती करण्यात आली. ५८३ जागांसाठी १ हजार १८२ उमेदवार रिंगणात आहेत. एकुण १ लाख २१ हजार २७६ मतदार मतदानाचा हक्क बजावणार असून त्यात ५७ हजार ३७६ महिला मतदान तर ६३ हजार ८९८ पुरुष मतदार आहेत. निवडणूक निर्णय अधिकारी उमेश पाटील यांनी १ हजार २५० मतदान अधिकाऱ्यांना निवडणूक आयोगाच्या आलेल्या मार्गदर्शक सुचना देऊन सर्व अधिकाऱ्यांना काही महत्त्वाच्या सुचना दिल्या. यानंतर सर्व केंद्राध्यक्षांना मतदानाचे साहित्य वितरीत करण्यात आले.

प्रत्येक केंद्राला पोलीस कर्मचाऱ्यांची नियुक्ती करण्यात आली. नगर तालुक्यातील निंबळक, बुऱ्हाणनगर, दरेवाडी या ठिकाणी निवडणूक आयोगाचे विशेष लक्ष राहणार आहे. त्यासाठी येथे कडेकोट बंदोबस्त तैनात करण्यात आला आहे. तसेच काही गावात चुरशीच्या लढतीमुळे वादावादी होण्याची शक्यता गृहीत धरून तीन भरारी पथकांची स्थापना करण्यात आली आहे. तसेच नायब तहसीलदार दर्जाच्या चार अधिकाऱ्यांचे पथके गावोगावी भेट देऊन पाहणी करणार आहेत. तालुक्यात सर्वत्र दुरंगी लढती होत आहेत. चुरशीच्या लढतींमुळे मतदानाची टक्केवारी वाढण्याची शक्यता आहे. बाहेरगावच्या मतदारांनाही उमेदवारांनी संपर्क करून मतदानासाठी येण्याची विणवनी केली आहे.

---------

नगर तालुक्यातील ५६ ग्रामपंचायतीच्या मतदानाची सर्व तयारी पूर्ण झाली आहे. मतदान प्रक्रिया सुरळीत चालण्यासाठी फिरत्या पथकांची स्थापना करण्यात आली आहे. अधिकाऱ्यांना सर्व प्रकारचे प्रशिक्षण दिले आहे. ३ भरारी पथके तैनात आहेत.

-उमेश पाटील,

तालुका निवडणूक निर्णय अधिकारी, नगर

फोटो : १४ नगर तालुका

नगर तहसील कार्यालयातून मतपेट्यांसह मतदान केंद्रावर निघालेले निवडणूक कर्मचारी.