अहमदनगर : जिल्ह्यातील पाच नगरपरिषदा व नगरपालिकांच्या निवडणुकांची प्रारुप मतदार यादी प्रसिद्ध झाली; मात्र कोरोनाच्या तिसऱ्या लाटेच्या सावटामुळे ही प्रक्रिया प्रारुप मतदार यादीवरच थांबली आहे, त्यामुळे या निवडणुकाही आता लांबल्या असल्याचे स्पष्ट झाले आहे.
जिल्ह्यातील अकोले, कर्जत, पारनेर, शेवगाव आणि जामखेड येथील नगरपालिका, नगरपंचायतीच्या निवडणुकीची प्रक्रिया सुरू झाली होती. त्यासाठी फेब्रुवारी-मार्चमध्ये या निवडणुकांची प्रक्रिया सुरू झाली होती. राजकीय पक्षांनीही मेळावे, सभा घ्यायला सुरुवात केली होती; मात्र कोरोनाची दुसरी लाट सुरू झाली आणि ही प्रक्रिया पूर्णपणे थांबली. त्यानंतर जूनमध्ये ही लाट ओसरल्यानंतर या निवडणुका होतील, अशी अपेक्षा होती; मात्र कोरोनाची संभाव्य तिसरी लाट येणार असल्याने आगामी निवडणुकाही पुन्हा लांबणीवर गेल्याने राजकीय कार्यकर्त्यांचा हिरमोड झालेला आहे.
-------------
नगरपालिका निवडणुकांसाठी प्रारुप मतदार यादी प्रसिद्ध करण्यात आली होती. मात्र ही प्रक्रिया थांबविण्यात आली आहे. पुढील प्रक्रिया सुरू करण्याबाबत सध्या कोणतेही आदेश नाहीत. त्यामुळे प्रारुप मतदार यादी जैसे थे आहे.
-गणेश शिंदे, प्रशासन अधिकारी, नगरपालिका विभाग, जिल्हाधिकारी कार्यालय