श्रीगोंद्यात निवडणूक यंत्रणा सज्ज, खासगी बसेसचा वापर

श्रीगोंदा : तालुक्यात ५८ ग्रामपंचायतीसाठी शुक्रवारी मतदान होणार आहे. ५०० जागांसाठी १ हजार ०९७ उमेदवार रिंगणात आहेत. सुमारे सव्वा लाख मतदार मतदानाचा हक्क बजावणार आहेत. मतदान प्रक्रियेची प्रशासनाने तयारी केली आहे. यंदा प्रथमच मतपेट्या, निवडणूक कर्मचाऱ्यांना पाठविण्यासाठी खासगी बसेसचा वापर केला जाणार आहे.

५८ ग्रामपंचायत निवडणुकीसाठी २२१ मतदान केंद्र आहेत. यामध्ये सात मतदान केंद्र संवेदनशील आहेत. यावर नियंत्रण ठेवण्यासाठी १ हजार ३४४ अधिकारी पोलीस कर्मचारी, होमगार्ड सज्ज आहेत. या निवडणुकीवर लक्ष ठेवण्यासाठी निवडणूक निरीक्षक रवींद्र परदेशी श्रीगोंद्यात दाखल झाले आहेत.

तहसीलदार प्रदीप पवार, अप्पर तहसीलदार चारुशीला पवार, नायब तहसीलदार डॉ. योगिता ढोले, सायली नांदे, गटविकास अधिकारी प्रशांत काळे, तालुका वैद्यकीय अधिकारी डॉ. नितीन खामकर, पोलीस निरीक्षक रामराव ढिकले, अरविंद माने, गटशिक्षणाधिकारी गुलाब सय्यद व त्यांची टीम नियोजनात व्यस्त आहे.

मतदान प्रक्रियेत प्रथमच ३५ खाजगी बसेसचा वापर करण्यात आला आहे. जादा भाड्याच्या नावाखाली ज्या परिवहन महामंडळाच्या लाल परीला नाकारण्यात आले आहे. कोरोनामुळे लाल परी अडचणीत आहे. निवडणुकीसाठी तरी तिचा वापर होणे अपेक्षित होते.

----

ग्रामपंचायत निवडणुकीच्या खर्चासाठी निधी कमी आहे. परिवहन महामंडळाच्या बसेसला जादा भाडे द्यावे लागते. तेवढा निधी आमच्याकडे नाही. कमी पैशात खासगी बसेस उपलब्ध झाल्या आहेत. जादा निधी असता तर परिवहन महामंडळाच्या बसेस वापरता आल्या असत्या.

- प्रदीप पवार,

तहसीलदार, श्रीगोंदा