कोरोना लसीकरणानंतर केंद्राबाहेर पडण्याची घाई नको

संगमनेर : कोरोना प्रतिबंधात्मक लस घेतल्यानंतर डॉक्टरांकडून प्रत्येकाला किमान अर्धा तास लसीकरण केंद्रात थांबण्याचा सल्ला दिला जातो. राज्यात कोरोना प्रतिबंधात्मक लसीकरण सुरू असून ही लस सुरक्षित आहे. परंतु लस घेतल्यानंतर काहींना चक्कर येणे अथवा काही इतर त्रास होऊ शकतो. प्रत्येकालाच हा त्रास होईल, असे मुळीच नाही. मात्र, तरीही खबरदारीचा उपाय म्हणून कोरोना प्रतिबंधात्मक लसीकरणानंतर केंद्राबाहेर पडण्याची घाई करू नका.

कोणत्याच प्रतिबंधात्मक लसीकरणामुळे कोणताच आजार होत नाही. लसीकरण हे आजार होऊ नये अथवा आजार झाल्यास त्याचे दुष्परिणाम कमी प्रमाणात व्हावेत, याकरिता केलेली प्रतिबंधात्मक उपाययोजना आहे. भारतात क्षयरोग, पोलिओ, गोवर, काविळ ब, स्वाइन फ्लू या आजारावरील लसी देण्यात येतात. सध्या कोरोना प्रतिबंधात्मक लसीकरण सुरू आहे. कोव्हॅक्सिन आणि कोविशिल्ड या दोन प्रकारच्या कोरोना प्रतिबंधात्मक लसींचे डोस देण्यात येत आहेत. त्या सुरक्षित असल्याचे डॉक्टरांनी सांगितले.

कोरोना प्रतिबंधात्मक लसीकरणाच्या पहिल्या टप्प्यात ‘फ्रंट लाइन वॉरियर्स’ म्हणजेच कोरोनाचा प्रादुर्भाव रोखण्यासाठी आघाडीवर काम करणाऱ्यांचे लसीकरण करण्यात आले. दुसऱ्या टप्प्यात ४५ वर्षांपुढील नागरिक व त्यानंतर १८ ते ४४ वयोगटातील नागरिकांच्या लसीकरणाला सुरुवात झाली. लसीकरणासाठी को-विन ॲपवर नोंदणी करत अनेकांनी लस घेतली आहे. काहींचे दोन्ही डोस पूर्ण झाले असून अनेकांचा दुसरा डोस बाकी आहे. लसीचा पहिला डोस घेतल्यानंतर काहींना चक्कर आल्याचे त्यांनी सांगितले. हे प्रमाण फारच कमी आहे.

परंतु तरीही लसीकरणानंतर काळजी घेणे गरजेचे आहे. तातडीने लसीकरण केंद्राबाहेर पडू नये. काही त्रास झाल्यास केंद्रात डॉक्टर उपलब्ध असतात. त्यामुळे त्रास झालेल्या व्यक्तीवर तातडीने उपचार करता येतात. लस घेतल्यानंतर तत्काळ बाहेर पडून त्रास झाल्यास हे धोक्याचे ठरू शकते.

------------

वयोगटानुसार लसीकरण (१७ जूनपर्यंत)

पहिला डोस दुसरा डोस

आरोग्य कर्मचारी ४४२०३ - ३१९७१

फ्रंटलाइन वर्कर्स ५५४९० - १९९६३

१८ ते ४४ वयोगट २०३०५ - ६२८१

४५ ते ५९ वयोगट २४६७४२ - ४१२२७

६० वर्षांवरील २५१८४६ - ७९४४९

एकूण ६१८५८६ - १७८८९१

-----------------

कोरोना प्रतिबंधात्मक लस घेतल्यानंतर काही त्रास होऊ शकतो. त्यामुळे लसीकरणानंतर अर्धा तास लसीकरण सत्राच्या ठिकाणी थांबण्याची सूचना केली जाते. तरीही कोणीही कोरोना प्रतिबंधात्मक लस घेतल्यानंतर तत्काळ लसीकरण स्थळावरून जाऊ नये.

- डॉ. संदीप कचेरिया, वैद्यकीय अधिकारी, ग्रामीण रुग्णालय, संगमनेर

---------------

घरी जाण्याची घाई करूच नये

कोरोना विरोधातील लढाईत लसीकरण हे अत्यंत प्रभावी शास्त्र आहे. लसीकरण हा उपचार नाही, तर प्रतिबंधात्मक उपाय आहे आणि लसीकरण हा एकमेव प्रतिबंधात्मक मार्ग नाही. मास्क लावणे, शारीरिक अंतराचे नियम पाळणे आणि हात साबणाने अथवा सॅनिटायझरने स्वच्छ धुवावेत. हे नियम प्रत्येकाने लसीकरण झाल्यानंतरही पाळणे गरजेचे आहे. कोरोना प्रतिबंधात्मक घेतल्यानंतर घरी जाण्याची घाई करूच नये. असेही वैद्यकीय अधिकारी डॉ. संदीप कचेरिया यांनी सांगितले.

..............

star 836

फोटो नेम : २२ कोरोना

ओळ : संगमनेरातील कोरोना प्रतिबंधात्मक लसीकरण केंद्रावर सुरू असलेले लसीकरण.