छत्रपतींची शिवलंका जाहली ‘शिवमय’ : नीतेश राणेंनी अर्पण केली शिवप्रतिकृती, पद व हस्त चिन्ह-शिवप्रेमींची उपस्थिती

मालवण : येथील ऐतिहासिक किल्ले सिंधुदुर्गवर शिवजयंती मोठ्या उत्साहात साजरी करण्यात आली. ढोल-ताशांचा गजर, शिवशाही गाणी, पोवाडे, भगवे फेटे, झेंडे, मर्दानी खेळ तसेच शिवज्योत मशालींनी आणि ‘छत्रपती शिवाजी महाराज की जय, जय भवानी, जय शिवाजी’च्या घोषणांनी संपूर्ण किल्ला तसेच मालवणनगरी शिवमय झाली. सिंधुदुर्ग किल्ल्यातील शिवराजेश्वर मंदिरात आमदार नीतेश राणे यांनी महाराजांच्या मूर्तीला अभिवादन करीत शिवप्रतिकृती, पद व हस्त चिन्ह अर्पण केले.

मालवण येथील सिंधुदुर्ग किल्ल्यावर अखिल भारतीय शिवछत्रपती जन्मोत्सव समितीच्यावतीने शिवजयंती व शिवजन्मोत्सव सोहळा शेकडो शिवप्रेमींच्या उपस्थितीत साजरा करण्यात आला.यावेळी आमदार नीतेश राणे यांच्यासह इतिहास तज्ज्ञ इंद्रजित सावंत, सचिन तोडकर, महाराष्ट्र स्वाभिमान पक्षाचे जिल्हाध्यक्ष देवदत्त सामंत, जिल्हा उपाध्यक्ष अशोक सावंत, तालुकाध्यक्ष मंदार केणी, बाळू कोळंबकर, मोहन वराडकर, नगरसेवक यतिन खोत, सुदेश आचरेकर, मिलिंद मेस्त्री, मेघा गांगण, चारुशिला आचरेकर, शिल्पा खोत, वैशाली शंकरदास, ममता खानोलकर, भाई मांजरेकर, राजू बिडये, अभय कदम यांच्यासह शेकडो शिवप्रेमी,

महिलांनी शिवाजी महाराजांचे दर्शन घेतले.
यावेळी मंदिराचे पुजारी श्रीराम सकपाळ यांच्यासह अन्य किल्ला रहिवाशांचा आमदार राणे यांच्या हस्ते शाल, श्रीफळ देऊन सत्कार करण्यात आला. छत्रपती शिवाजी महाराज आमचे सर्वस्व आहेत. त्यामुळे महाराजांबद्दल चुकीचा इतिहास सांगणारी विकृती शिवभक्तांनी हाणून पाडायला हवी.  शिवभक्त, शिवप्रेमींची व्याख्या बदलत चालली आहे. फुले-शाहू-आंबेडकर यांना नावे ठेवणाºयाना आजकाल शिवभक्त म्हणून ओळखले जाऊ लागले आहे.महाराजांचा खोटा इतिहास पुढे आणणाºयांना महाराष्ट्र भूषण पुरस्कार देऊन गौरविले जाते, अशी शोकांतिका आमदार नीतेश राणे यांनी व्यक्त केली. महाराजांच्या गडकिल्ल्यांकडे जर कोणी वाकड्या नजरेने बघत असेल तर कोणत्याही कायद्याची पर्वा न करता त्याला तेथेच शिक्षा करण्याचे काम शिवभक्तांनी करायला हवे, असे ते यावेळी उपस्थितांना म्हणाले.

महाराजांचे विचार आत्मसात करा!
नीतेश राणे म्हणाले,  शिवाजी महाराज, जिजाऊ माता, संभाजी महाराज, शाहू महाराज यांच्याबद्दल विकृत लिखाण, इतिहास सांगितला जात आहे. चुकीचा इतिहास सांगून शिवसृष्टी बनण्याचा प्रकार राज्यात होत आहे. चुकीचा इतिहास सांगून काहीजण स्वत:ला शिवभक्त म्हणवित आहे. यामुळे सर्व शिवभक्तांनी अंगात कडवटपणा आणण्याची गरज निर्माण झाली आहे. कुठल्याही कायद्याची तमा न बाळगता आपल्या महापुरुषाची अशी बदनामी होऊ न देता महाराजांचे विचार शिवभक्तांनी आत्मसात करायला पाहिजेत.

मंदिर सुशोभिकरणात योगदान देणार
शिवराजेश्वर मंदिर हा अमूल्य ठेवा आहे. किल्ल्याच्या विकासाला हातभार लावण्यासाठी नारायण राणे, निलेश राणे यांचे योगदान राहिले आहे. शिवजयंतीच्या निमित्ताने शिवरायांच्या महाराष्ट्रात आमदार, खासदार म्हणून न वावरता महाराजांचे मावळे म्हणूनच आम्ही वावरत आहोत. महाराजांचे विचार, गडकिल्ले यांना आम्ही कशी ताकद देऊ शकतो यासाठी दिवसरात्र मेहनत करणार आहोत. किल्ला सुशोभिकरणासाठी ज्या तांत्रिक अडचणी आहेत त्या दूर करण्याची जबाबदारी मी स्वत: घेत आहे.जो शिवभक्त असतो तो आपल्यापरीने योगदान देत असतो. ते योगदान आम्हीही देऊ, असे आश्वासन यावेळी नीतेश राणे यांनी दिले.
पोवाड्यांच्या माध्यमातून शिवगीते सादर
शिवजयंतीनिमित्त कोल्हापूरच्या मावळ्यांनी मंदिरात फुलांची आरास केली होती. मंदिर परिसरात लक्षवेधक रांगोळी रेखाटण्यात आली होती. तर पोवाड्यांच्या माध्यमातून शिवगीते सादर करण्यात आली.