Pune: दुचाकी घसरल्याने टँकरने चिरडले; एकाचा मृत्यू, नगर रस्त्यावर भीषण अपघात

याप्रकरणी टँकर चालकाविरुद्ध लोणीकंद पोलिसांनी गुन्हा दाखल केला....

पुणे : नगर रस्त्यावर टँकरच्या धडकेत दुचाकीवरील सहप्रवाशाचा मृत्यू झाल्याची घटना घडली. अपघातात दुचाकीस्वारासह दोघे जखमी झाले. याप्रकरणी टँकर चालकाविरुद्ध लोणीकंद पोलिसांनी गुन्हा दाखल केला.

राजेंद्र तुकाराम बोंडे (४६, रा. गणेशननगर, वडगाव शेरी) असे मृत्युमुखी पडलेल्या सहप्रवाशाचे नाव आहे. अपघातात दुचाकीस्वार सुनील किसन मांगले (४२, रा. अष्टविनायक सोसायटी, वडगाव शेरी), सूरज सदाशिव पाटील जखमी झाले आहेत. त्यांच्यावर खासगी रुग्णालयात उपचार सुरू आहेत. याप्रकरणी टँकरचालकाविरुद्ध गुन्हा दाखल करण्यात आला आहे. मांगले यांनी याबाबत लोणीकंद पोलिस ठाण्यात फिर्याद दिली आहे.

दुचाकीवरून तिघे नगर रस्त्याने निघाले होते. वाघोली-केसनंद रस्त्यावर कोणार्क ऑर्चिड सोसायटीसमोर अचानक पादचारी आडवा आला. पादचाऱ्याला वाचवण्याच्या प्रयत्नात दुचाकीस्वाराने ब्रेक दाबला. दुचाकी घसरल्याने तिघेजण रस्त्यात पडले. त्यावेळी पाठीमागून आलेल्या टँकरने मांगले, बोंडे, पाटील यांना धडक दिली. अपघातात गंभीर जखमी झालेल्या बोंडे यांचा उपचारादरम्यान मृत्यू झाला. पोलिस कर्मचारी कर्णेवर तपास करत आहेत.