पिंपरी-चिंचवडमध्ये रिक्षात ओढून महिला पोलिसाचा विनयभंग; तिघांना अटक

रात्री सव्वानऊच्या सुमारासची घटना

पिंपरी : रिक्षा व्यवस्थित चालविण्यास सांगितल्याने महिला पोलिसासोबत गैरवर्तन केले. रिक्षात ओढून विनयभंग केला. याप्रकरणी रिक्षाचालकासह तिघांना अटक केली. भारतमाता चौक, मोशी येथे मंगळवारी (दि. २२) रात्री सव्वानऊच्या सुमारास ही घटना घडली. 

विश्वदीप भरत मादलापुरे (वय १९), अभिषेक बाळासाहेब पोळ (वय १९), सुनील शिवाजी कसबे (वय २०, तिघे रा. बनकरवस्ती, मोशी) अशी अटक केलेल्यांची नावे आहेत. पोलीस कर्मचारी असलेल्या पीडित महिलेने याप्रकरणी बुधवारी (दि. २३) एमआयडीसी भोसरी पोलीस ठाण्यात फिर्याद दिली.

पोलिसांनी दिलेल्या माहितीनुसार, आरोपींनी त्यांच्या ताब्यातील रिक्षा वेडीवाकडी आणि इतरांच्या जीवाला धोका निर्माण होईल अशा रीतीने चालवली. त्यामुळे फिर्यादीने आरोपींना रिक्षा व्यवस्थित चालवण्यास सांगितले. पोलीस कर्मचारी असलेल्या फिर्यादी महिलेचे न ऐकता आरोपी पुढे निघून गेले.

त्यानंतर भारतमाता चौकात सिग्नलवर रिक्षा थांबली असता फिर्यादी महिला पोलीस तेथे पोहचल्या. मी पोलीस आहे. रिक्षा व्यवस्थित चालवा, असे फिर्यादीने सांगितले. त्यावेळी आरोपींनी फिर्यादीसोबत गैरवर्तन करून फिर्यादीचा विनयभंग केला. तसेच फिर्यादीला रिक्षात ओढून रिक्षा तशीच पुढे पळवून नेली, असे फिर्यादीत नमूद आहे. सरकारी कामात अडथळा आणून विनयभंग केल्याप्रकरणी गुन्हा दाखल करून पोलिसांनी आरोपींना अटक केली.