Health Tips: उन्हाळ्यात ओठ फुटण्यामागचे कारण आणि त्यावर उपाय काय? जाणून घ्या!

Lip care: हिवाळ्यात त्वचा कोरडी पडून ओठ फुटतात हे समजू शकतो, मात्र उन्हाळ्यात ओठ फुटतात तेव्हा प्रश्न पडतो. उन्हाळ्यात वातावरणातील ओलावाचे प्रमाण बऱ्याच प्रमाणात कमी होते. ओलावा कमी झाल्यामुळे, ओठ कोरडे होण्याची प्रक्रिया सुरू होते. ओठांची त्वचा शरीरातील सर्वात पातळ त्वचा असते. या व्यतिरिक्त, फक्त ओठ हे शरीरातील असे ठिकाण आहे जेथे रोम छिद्रे नसतात आणि घाम बाहेर पडत नाही. म्हणून, शरीरात पाण्याची कमतरता निर्माण होताच, कोरडा होणारा पहिला भाग म्हणजे ओठ. त्याची काळजी कशी घ्यावी ते जाणून घेऊ.

खोबरेल तेल

कापसाच्या तुकडयाने किंवा स्वच्छ बोट खोबरेल तेलात बुडवून ओठांवर लावा. दिवसभरात आवश्यकतेनुसार कितीही वेळा हे लावता येऊ शकते. रात्री झोपताना ओठांना तेलाच्या बोटाने मसाज केल्यास त्वचा सुधारते.

कोरफड जेल:

बाजारात अनेक प्रकारच्या एलोवेरा जेल मिळतात. त्यात चांगल्या प्रतीच्या जेल ची निवड करावी. बोटांनी ऍलोवेरा जेल ओठांवर लावावे. ऍलोवराच्या एंजाइममध्ये माइल्ड एक्सफोलिएटिंगचे गुण आढळतात. त्यामुळे याचा उपयोग दिवसातून २ ते ३ पेक्षा जास्त वेळा करु नये.

मध :

मधाचा वापर सहज सोपा आणि अत्यंत गुणकारी असतो. मध ओठांवर लावण्यासाठी नेहमी सेंद्रिय किंवा कच्चे मध निवडा. तर्जनीवर मध घेऊन तो ओठांवर लावा. परंतु मधाची ऍलर्जी असणाऱ्या लोकांनी हा उपाय करणे टाळावे.

व्हाइट पेट्रोलियम जेली:

व्हाइट पेट्रोलियम जेली हा स्वस्त आणि मस्त उपाय आहे. मात्र उन्हाळ्यात त्याचा जास्तही वापर करू नये. दिवसातून एक ते दोन वेळा त्याचा उपयोग करावा. कारण प्रमाणापेक्षा जास्त वापराने ओठांची त्वचा काळवंडू शकते.

गुलाबपाणी:

सकाळी अंघोळ झाल्यावर आणि रात्री झोपताना कापसाच्या बोळ्याने गुलाबपाणी ओठांना लावा. त्यामुळेही ओठ मऊसूत होतात. ओठांच्या नाजूक त्वचेला गुलाबपाण्याने हायड्रेशन मिळते आणि ओठ गुलाबी होतात.

तूप:

सर्दी असो नाहीतर गर्मी, घरी बनवलेले साजूक तूप ओठांसाठी केव्हाही चांगले. घरी कढवलेले साजूक तूप नसेल तर बाजारातून विकतचे गायीचे तूप आणावे आणि दिवसातून गरजेनुसार तीन ते चार वेळा तुपाचे बोट ओठांवर फिरवावे. रात्री हा उपाय केल्यास लवकर फरक पडतो.

पाणी :

उन्हाळ्यात त्वचेची काळजी घ्यायची असेल तर भरपूर पाणी प्या हा मुख्य सल्ला दिला जातो. शरीरात पाण्याची पातळी संतुलित असेल तर त्वचाविकार होत नाहीत. ओठ हा आपल्या शरीराचा नाजूक भाग. ते कोरडे पडणे, फाटणे म्हणजे शरीरातील पाण्याची पातळी कमी झाली हे समजावे.