यवतमाळात काँग्रेस, राष्ट्रवादीसह १९ उमेदवारांचे डिपॉझिट जप्त

यवतमाळ विधानसभेत भाजप आणि शिवसेनेच्या काट्याच्या लढतीत बसपालाच केवळ आपले डिपॉझिट कायम राखता आले. सत्तेत असलेल्या काँग्रेस आणि राष्ट्रवादी काँग्रेसच्या उमेदवारांसह १९ विविध

यवतमाळ : यवतमाळ विधानसभेत भाजप आणि शिवसेनेच्या काट्याच्या लढतीत बसपालाच केवळ आपले डिपॉझिट कायम राखता आले. सत्तेत असलेल्या काँग्रेस आणि राष्ट्रवादी काँग्रेसच्या उमेदवारांसह १९ विविध पक्षांच्या उमेदवारांना आपले डिपॉझिटही राखता आले नाही. यवतमाळ विधानसभेची निवडणूक ही चौरंगी होणार अशी शक्यता सुरुवातीला वर्तविली जात होती. मात्र मतदारांनी आपला कौल भाजप आणि शिवसेना उमेदवाराच्या बाजूने लावल्यामुळे सर्व अंदाज चुकीचे ठरले. विधानसभेच्या इतिहासात प्रथमच बसपाच्या उमेदवाराला सर्वाधिक मते मिळाली आहे. मो. तारिक समी यांना ३४ हजार ४९८ इतकी मते मिळाली. मात्र बसपाच्या या कामगिरीमुळे काँग्रेस आणि राष्ट्रवादी काँग्रेसच्या उमेदवारांना आपले डिपॉझिट कायम राखणे शक्य झाले नाही. काँग्रेसने येथील आमदार नंदिनी पारवेकर यांचे तिकीट कापून राहुल ठाकरे यांच्या माध्यमातून नवीन चेहरा देण्याचा प्रयत्न केला. मात्र त्यांना अनामत कायम ठेवता येईल इतकीही मते मिळाली नाही. त्यांना ३१ हजार १५२ मते मिळाली. जिल्हा परिषद, नगरपरिषद, पंचायत समिती या स्थानिक स्वराज्य संस्थेत वैशिष्ट्यपूर्ण खेळी करून राष्ट्रवादीची सत्ता स्थापन करणाऱ्या विधान परिषद आमदार संदीप बाजोरिया यांनासुद्धा अनामत कायम राखता आली नाही. या निवडणुकीत सर्वाधिक लोकप्रतिनिधींचा फौजफाटा हा राष्ट्रवादीजवळ होता. मात्र त्यांचा कुठलाही प्रभाव या निवडणुकीतून दिसून आला नाही. काही ग्रामीण भाग वगळता राष्ट्रवादीला मते मिळविण्यासाठी चांगलाच दमखम लावावा लागला. त्यानंतरही केवळ १७ हजार ९०९ इतकी मते बाजोरिया यांना मिळाली. यानंतर मनसेचे भानुदास राजने यांना दोन हजार ३७३, अपक्ष असलेले प्रदीप वादाफळे एक हजार ७०८, कर्मचारी नेते रवींद्र देशमुख एक हजार १८९, ज्ञानेश्वर राठोड ८९०, जगदीश देशमुख ५९०, शेतकरी कामगार पक्षाचे दिलीप मुक्कावार २८०, अशोक शेंडे ४०७, सोपान कांबळे २०३, केशव भागवत २३७, वासुदेव कोकाटे २१५, मनीष ढाले ३६९, प्रशांत राठोड ४५४, राहुल अशोक ठाकरे ४९४, शिवकुमार परचाके ४६९, वसंत कनाके ३४५ मते मिळाली आहे. यातील रवींद्र देशमुख यांच्या मतांच्या आकडेवारीची उत्सुकता सर्वांनाच होती.