यवतमाळ : शहराच्या मध्यवस्तीत असलेल्या पोस्टल मैदान हे खेळासाठी आरक्षित आहे. मात्र गेल्या काही दिवसांपासून या मैदानाचा व्यावसायिक उपयोग केला जात आहे. अनेक वर्षानंतर मैदानावर सौंदर्यीकरणासह वॉकिंग ट्रॅक तयार करण्यात आला. मात्र व्यावसायिक नाटकासाठी स्टेज उभारताना चक्क या ट्रॅकवरच खोदकाम करण्यात आले आहे. सौंदर्यीकरणाला सुरूंग लावण्याचा प्रयत्न येथे सुरू आहे. पोस्टल मैदान हे जिल्हाधिकाऱ्यांच्या अधिनस्थ असून, त्याच्या वापरासंदर्भात उपविभागीय अधिकारी कार्यालयातून परवानगी देण्यात येते. मुळात क्रीडा स्पर्धांसाठी हे मैदान आरक्षित आहे. येथे सांस्कृतिक कार्यक्रमही घेतले जातात. व्यावसायिक कार्यक्रमासाठी मैदान देत असताना शुल्क आकारणी करून त्याच्या सौंदर्याला हाणी पोहोचणार नाही अशी अट घातली जाते. त्याउपरही या व्यावसायिक नाटकासाठी चक्क वॉकिंग ट्रॅकमध्येच खोदकाम करण्यात आले आहे. या गंभीर प्रकाराची दखल घेऊन ज्येष्ठ नागरिक मंडळाने जिल्हाधिकाऱ्यांकडे तक्रार केली आहे. सायंकाळी फिरण्यासाठी मध्यवस्तीत एकमेव मैदान असून, तेथे सातत्याने व्यावसायिक कार्यक्रम होतात. त्यामुळे मैदानाची दुरावस्था झाली आहे. शिवाय रात्रीच्यावेळी या मैदानावर अनैतिक प्रकार चालतात. उघड्यावरच दारु पिऊन बाटल्या फोडण्यात येतात. अनेक हुल्लडबाज येथे रात्री धिंगामस्ती करताना दिसून येतात. त्यामुळे सायंकाळी पोस्टल मैदानावर पायदळ फिरणे शक्य होत नाही. (कार्यालय प्रतिनिधी)बाईकस्वारांची स्टंटबाजीपोस्टल मैदानावर करण्यात आलेल्या वॉकिंग ट्रॅकवर रात्री उशिरा बाईकस्वारांची स्टंटबाजी सुरू होते. रस्त्यावरची वर्दळ कमी झाल्यानंतर हे बाईकस्वार मैदानातील ट्रॅकवर जाऊन आपल्या अवजड बाईक्स सुसाट उडविताना दिसतात. यामुळेसुद्धा या ट्रॅकची दुरावस्था होत आहे. पोस्टल मैदान हे दंगामस्तीचे ठिकाण बनले आहे. या मैदानावर व्यावसायिक कार्यक्रमाची नेहमीच रेलचेल राहते उर्वरित वेळेत हे मैदान टपोरींचा अड्डा म्हणून ओळखल्या जात आहे. सर्वसामान्य नागरिकांची कुचंबना होत आहे.