Yavatmal News | Latest Yavatmal News in Marathi | Yavatmal Local News Updates | ताज्या बातम्या यवतमाळ | यवतमाळ समाचार | Yavatmal Newspaper

जोन्नलवार हत्या प्रकरण : रहस्य कायम, मालमत्ता कारणीभूत असण्याची शक्यतावणी : येथील साई नगरतील कल्पना शिवकुमार जोन्नलवार या ५० वर्षीय विधवा महिलेच्या खुनाची पोलिसांत फिर्याद देणाराच अखेर मारेकरी निघाला. पोलिसांनी रविवारी सायंकाळी फिर्यादी चंद्रशेखर गंगशेट्टीवार याला अटक करून सोमवारी न्यायालयासमोर उभे केले.रक्षाबंधनाच्या दिवशी म्हणजे गेल्या १० आॅगस्टला रात्री २ वाजताच्या सुमारास कल्पना यांचा त्यांच्याच घरातील दिवाणामध्ये कोंबलेल्या अवस्थेतील मृतदेह आढळला होता़ पोलिसांनी घटनास्थळी दाखल होऊन पंचनामा केला. या प्रकरणी फिर्यादी चंद्रशेखर गंगशेट्टीवार यांच्या तक्रारीवरून अज्ञात आरोपीविरूध्द भादंवि ३0२ नुसार खुनाचा, तर भादंवि २0१ नुसार पुरावा नष्ट केल्याचा गुन्हा दाखल करण्यात आला होता. विशेष म्हणजे मृतक कल्पना ९ आॅगस्टपासून घरी एकट्याच होत्या़ ९ आॅगस्टलाच त्यांचा साई नामक २५ वर्षीय मुलगा चंद्रशेखर यांच्या मध्यप्रदेशातील विवाहित मुलीकडे अर्थात साईच्या मावस बहिणीकडे चंद्रशेखर यांच्या श्रेयस नामक मुलासोबतच रक्षाबंधनासाठी गेला होता. हीच संधी साधून कल्पना यांचा खून करण्यात आला होता.रक्षाबंधनाला मृतक कल्पनाचे बंधू अनिल रेगुंडवार हे चंद्रपूर जिल्ह्यातील कोरपना येथून वणीत आले होते. त्यांच्या वणीत मृतक कल्पनासह इतर दोन बहिणी राहतात. प्रथम ते सविता यांच्या घरी गेले. याच सविताचे चंद्रशेखर गंगशेट्टीवार हे यजमान आहेत. सविताने राखी बांधल्यानंतर अनिल दुसरी बहिण वर्षा यांच्याकडे गेले होते. सरतेशेवटी ते मोठी बहिण मृतक कल्पना यांच्या घरी पोहोचले, तेव्हा त्यांच्या घराचे प्रवेशव्दार बंद आढळले. तसेच कल्पना यांचा मोबाईलही ‘स्वीच आॅफ’ येत होता. अनिल यांनी शेजारी विचारपूस केली असता, कल्पना कुठेच आढळल्या नव्हत्या. त्यानंतर सर्व नातेवाईक त्याच दिवशी रात्री सविता चंद्रशेखर गंगशेट्टीवार यांच्या घरी गोळा झाले होते.या सर्व प्रकारानंतर चंद्रशेखर गंगशेट्टीवार यांनीच वणी पोलिसांत तक्रार दिली. त्याच रात्री मृतक कल्पना यांच्या चंद्रपूर येथील प्रिया आणि अहेरी येथील प्रियंका नामक विवाहित मुली वणीत दाखल झाल्या होत्या. मुली आणि जावई मृतक कल्पना यांच्या घरी झोपण्यासाठी गेल्या असता बेडरूममधील दिवणामध्ये कल्पनाचा मृतदेहच आढळून आला होता. या खुनाच्या तपासासाठी वणी पोलिसांनी यवतमाळ येथून श्वान पथक व ठसे तज्ज्ञांना पाचारण केले होते़ त्यानंतर शवविच्छेदनाच्या प्राथमिक अहवालावरून कल्पना यांचा मृत्यू गुदमरून झाल्याचे स्पष्ट झाले होते.दरम्यान मृतक कल्पना यांचा मोबाईलही गहाळ होता. संंबंधित कंपनीकडून पोलिसांनी त्यातील कॉल डिटेल्स मागविले होते. कल्पना यांच्या घरातील सर्व कागदपत्रेही पोलिसांनी तपासली़ तरीही महिना लोटूनही पोलीस खऱ्या मारेकऱ्यापर्यंत पोहोचू शकले नव्हते. त्यामुळे पोलिसांच्या कार्यक्षमतेवरच प्रश्नचिन्ह निर्माण करण्यात येत होते. विविध संघटनांनी या खुनाचा छडा लावण्यासाठी ठाण्यावर धडक दिली होती. मात्र आरोपी गुलदस्त्यातच होता.परिस्थितीजन्य पुरावे आणि तपासातून या खुनाचा अखेर उलगडा झाला. परिस्थितीजन्य पुराव्यांमध्ये अत्यंत गुंतागुंत असल्याने खऱ्या आरोपीपर्यंत पोहोचण्यास पोलिसांना उशीर झाला. हत्यारा कुणी तरी परिचित, निकटवर्तीय असावा, या दिशेने पोलिसांनी प्रथमपासूनच तपासाची चक्रे फिरविली होती. अखेर त्यांचा ‘होरा’ खरा ठरला अन् कल्पन्ना यांच्या खुनाची फिर्याद देणारा चंद्रशेखर हाच आरोपी निघाला. त्याला रविवारी सायंकाळी उशिरा पोलिसांनी अटक केली. सोमवारी दुपारी ४.१५ वाजताच्या सुमारास त्याला न्यायालयासमोर उभे केले. (कार्यालय प्रतिनिधी)

Yavatmal (Marathi News)