संशयास्पद स्थितीत आढळला मायलेकाचा मृतदेह, घातपाताची शंका 

आत्महत्येचा संशय : कळमना शिवारातील घटना

ठळक मुद्देकळमना शेतशिवारात रविवारी दुपारी गुराखी जनावरे चरत असताना त्याला नागोराव कातकडे यांच्या शेतात या दोघांचे मृतदेह आढळून आले. तसेच त्यांच्याजवळ मोनोसील नावाचा विषारी औषधाचा डबाही आढळून आला.

वणी (यवतमाळ) : चिखलगावलगच्या कळमना शिवारातील नाल्याजवळ रविवारी दुपारी २.३० वाजताच्या सुमारास मायलेकाचा मृतदेह आढळून आला. ही आत्महत्या की घातपात, याबाबत शंका व्यक्त केली जात आहे. संगीता दुर्वास निखाडे (४५) व राहुल दुर्वास निखाडे (२२) असे मृत मायलेकाचे नाव असून हे दोघेही चिखलगाव येथील रहिवासी आहेत.

कळमना शेतशिवारात रविवारी दुपारी गुराखी जनावरे चरत असताना त्याला नागोराव कातकडे यांच्या शेतात या दोघांचे मृतदेह आढळून आले. तसेच त्यांच्याजवळ मोनोसील नावाचा विषारी औषधाचा डबाही आढळून आला. त्यामुळे या दोघांनी आत्महत्या केली की घातपात करण्यात आला, याबाबत शंका व्यक्त केली जात आहे. याबाबत प्रभारी पोलीस पाटलाने वणी पोलिसात तक्रार दिली. त्यानंतर पोलिसांचा ताफा घटनास्थळी पोहोचला. त्या दोघांनी विष प्राशन करून आत्महत्या केल्याचा अंदाज पोलिसांनी वर्तविला आहे. दरम्यान दुर्वास निखाडे हे बाहेरगावी असल्याने त्यांना या घटनेबाबत माहिती देण्यात आली. या दोघांचेही मृतदेह शवविच्छेदनासाठी वणीच्या ग्रामीण रूग्णालयात नेण्यात आले. शवविच्छेदन अहवालानंतरच आता मृत्यूचे कारण कळू शकेल. या प्रकरणाचा पुढील तपास ठाणेदार वैभव जाधव यांच्या मार्गदर्शनाखाली जमादार प्रभाकर कांबळे, प्रशांत आडे हे करित आहे.