यवतमाळात सर्वाधिक खर्च काँग्रेस उमेदवाराचा

विधानसभा निवडणुकीत यवतमाळ मतदारसंघात सर्वाधिक खर्च काँग्रेस उमेदवाराचा झाला असून अपक्ष मात्र खर्चात मागे पडले आहे.

यवतमाळ : विधानसभा निवडणुकीत यवतमाळ मतदारसंघात सर्वाधिक खर्च काँग्रेस उमेदवाराचा झाला असून अपक्ष मात्र खर्चात मागे पडले आहे. २२ उमेदवारांपैकी २१ जणांनी निवडणूक खर्च सादर करण्यास टाळाटाळ केल्याने त्यांना नोटीस बजावण्यात आली आहे.विधानसभा निवडणुकीत निवडणूक आयोगाने प्रत्येक उमेदवाराला खर्चाची मर्यादा घालून दिली होती. २८ लाखांच्या आत उमेदवाराने खर्च करावा, असा दंडक होता. मात्र बहुतांश उमेदवारांनी त्यापेक्षाही अर्ध्या रकमेतच निवडणूक लढविल्याचे अहवाल सादर केले आहे. कोट्यवधीचे उड्डान घेणाऱ्या उमेदवारांनी खर्च मात्र दहा लाखांच्या आसपासच दाखविल्याचे दिसत आहे. पक्षीय उमेदवारांचा खर्च पाच लाखांच्या घरात तर अपक्ष उमेदवारांचा खर्च हजाराच्या आकड्यातच झाल्याचे दिसते. यवतमाळ विधानसभा मतदारसंघात २२ उमेदवार रिंगणात होते. प्रत्येक उमेदवाराला दर २४ तासाला खर्चाचा हिशेब सादर करण्याचे निवडणूक विभागाने आदेश दिले. त्यानुसार बहुतांश उमेदवारांनी १२ ते १३ आॅक्टोबरपर्यंत निवडणूक खर्च सादर केला. इतर चार दिवसांचा खर्च त्यांनी अद्यापही खर्च सादर केला नाही. त्यामुळे २२ पैकी २१ उमेदवारांना निवडणूक विभागाने नोटीस बजावली आहे. यवतमाळ विधानसभा मतदारसंघात सर्वाधिक खर्च काँग्रेसचे उमेदवार राहुल ठाकरे यांच्या नावावर आहे. त्यांनी १२ आॅक्टोबरपर्यंतचा हिेशेब सादर केला. त्यानुसार त्यांनी दहा लाख १५ हजार ८७१ रुपये खर्च केल्याचे स्पष्ट होते. राष्ट्रवादीचे उमेदवार संदीप बाजोरिया यांनी ११ आॅक्टोबरपर्यंतचा खर्च सादर केला असून त्यांनी सात लाख ४७ हजार ९८८ खर्च केल्याचे अहवालात म्हटले आहे. भाजपा उमेदवार मदन येरावार यांनी १३ आॅक्टोबरपर्यंत खर्चाचा अहवाल सादर केला असून आठ लाख ८८ हजार १४९ रुपये खर्च केल्याचे म्हटले आहे. बसपाचे उमेदवार मो.तारीक मो. शमी लोखंडवाला यांनी १२ आॅक्टोबरपर्यंतच्या खर्चाचे विवरण सादर केले असून सात लाख ३४ हजार १४३ रुपये निवडणुकीत खर्च केले आहे. शिवसेना उमेदवार संतोष ढवळे यांनीही १२ आॅक्टोबरपर्यंतचा खर्च निवडणूक विभागाकडे सादर केला असून चार लाख २३ हजार ६६५ रुपये खर्च झाल्याचे म्हटले आहे. अपक्ष प्रदीप वादाफळे यांनी १३ आॅक्टोबरपर्यंत सहा लाख १० हजार ६५२ रुपये, मनसे उमेदवार भानुदास राजने यांनी एक लाख ४८ हजार रुपये, अपक्ष रवींद्र देशमुख यांनी तीन लाख ५६ हजार ४४०, हिरालाल गायकवाड ३८ हजार ८८२, दिलीप मुक्कावार एक लाख ३२ हजार ५२५, पुरुषोत्तम भजगवरे २२ हजार ४६०, अशोक शेंडे ६५ हजार ११०, सोपान कांबळे २६ हजार २४६, वासुदेव कोकाटे २१ हजार ३९५, अ‍ॅड. चंद्रशेखर देशमुख १६ हजार ५००, मनीष ढाले ११ हजार ६००, प्रशांत राठोड १० हजार ५७४, राहुल अशोकराव ठाकरे दहा हजार २९० रुपये, वसंत कनाके २३ हजार २१० आणि ज्ञानेश्वर राठोड यांनी १६ हजार १० रुपयांचा खर्च केल्याचे अहवालात म्हटले आहे. (शहर वार्ताहर)