एटीएसला अतिरेकी हालचालींचा संशय; अहिल्यानगर, यवतमाळमध्ये झाडाझडती

उमरखेड, पुसदमध्ये १४ ठिकाणी पहाटे एकाच वेळी पाेहाेचले पाेलिस

यवतमाळ/अहिल्यानगर : दहशतवादी हालचालींविषयी मिळालेल्या गुप्त माहितीनंतर महाराष्ट्र दहशतवाद विरोधी पथकाने (एटीएस) यवतमाळ आणि अहिल्यानगर जिल्ह्यांत अचानक व्यापक शोधमोहीम राबवली. या कारवाईत अनेक संशयितांना चौकशीसाठी ताब्यात घेण्यात आले असून अद्याप कोणालाही अटक करण्यात आलेली नाही, अशी माहिती अधिकाऱ्यांनी रविवारी दिली.

IND vs PAK : टीम इंडियाचा 'ई'शानदार विजय! पाकिस्तानचा धुव्वा उडवत दाबात मारली सुपर ८ मध्ये एन्ट्री

मध्यरात्रीच्या सुमारास सुरू झालेल्या या मोहिमेत दोन्ही जिल्ह्यांतील २१ हून अधिक ठिकाणी झडती घेण्यात आली. या कारवाईत डझनभराहून अधिक संशयितांना ताब्यात घेण्यात आले आहे. पुसद व उमरखेड येथे १४ संशयितांची कसून चौकशी सुरू आहे. यामध्ये शनिवारी रात्री ११ वाजेपासून रविवारी दुपारपर्यंत संशयितांची घरे, ऑफिसेस आदी ठिकाणी वॉरंटद्वारे झडती प्रक्रिया सुरू हाेती. आक्षेपार्ह कागदपत्रे, मोबाइल, इलेक्ट्रॉनिक गॅझेट, सीसीटीव्ही यांची तपासणी व जप्ती केली आहे. या प्रक्रियेमध्ये कोणालाही अटक केली नसून, संशयिताची सखोल विचारपूस केली जात आहे.

संशयितांची चौकशी, शोधमोहीम सुरूच

अहिल्यानगर जिल्ह्यातही सात ठिकाणी समान धर्तीवर छापेमारी करण्यात आली. तेथूनही संशयितांकडून आक्षेपार्ह साहित्य जप्त करण्यात आले आहे. सर्व संशयितांची सध्या चौकशी सुरू असून शोधमोहीम अद्याप कायम आहे, असे अधिकाऱ्यांनी स्पष्ट केले. अहिल्यानगर शहरातील मुकुंदनगर भागात रविवारी पहाटे एटीएस पथकाने छापे टाकले. काही घरांमध्ये पथकाकडून तपासणी सुरू असताना मुकुंदनगर भागात अहिल्यानगरचे स्थानिक पोलिस कर्मचाऱ्यांचा बंदोबस्त तैनात केला होता.

१२ संशयितांच्या घराची झाडाझडती

पुसद शहर पाेलिस ठाणे हद्दीत एका घरी व वसंतनगर येथे तब्बल १२ संशयितांच्या घराची दहशतवादविरोधी पथकाने झाडाझडती घेतली. एकाच वेळी १३ ठिकाणी धाड मारल्याने शहरात विविध चर्चांना उधाण आले आहे. यापूर्वी लखनौ एटीएसने पाच वर्षांपूर्वी धर्मांतर प्रकरणात पुसद येथील एका डाॅक्टरला व यवतमाळ एका युवकाला ताब्यात घेतले हाेते.

उमरखेडमध्ये एका घरी तर पुसद शहरात १३ घरी एटीएस पथकाने धाड घातली. चौकशी करून तेथून काही साहित्य ज्यात मोबाइल, पुस्तक, लॅपटॉप, पेनड्राइव्ह हे जप्त केले. एटीएसची १५० जणांची टीम येथे आली होती. एटीएसचे आयजी चंद्रकिशोर मीना यांनीसुद्धा उमरखेड, पुसद शहर येऊन कारवाईची पाहणी केली.

कुमार चिंता, पोलिस अधीक्षक, यवतमाळ.