तलावात बुडून युवकाचा मृत्यू

गावाजवळील तलावात नरेश कांबळे पडल्याची माहिती मिळताच, येडशी येथील पोलीस पाटील गणेश बारड यांनी वनोजा येथील साळुंकाबाई राऊत महाविद्यालय वनोजा रासेयोच्या आपत्ती व्यवस्थापन बचाव पथकला पाचारण केले. तलाव खोल असल्याने व पाणी गढूळ असल्याने, त्यांचा मृतदेह स्थानिकांना मिळत नव्हता. बचाव पथकाचे सदस्य तत्काळ साहित्यासोबत घटनास्थळी दाखल झाले. स्थानिकांना सोबत घेऊन रेस्क्यू ऑपरेशन राबविले. पाणी गढूळ असल्याने व खोल असल्याने, तसेच गाळ भरपूर असल्याने ऑपरेशनमध्ये व्यत्यय येत होते. यावेळी अवघ्या एका तासातच २० फूट खोल गढूळ पाण्यात गाळात फसलेल्या नरेश कांबळे यांचा मृतदेह पथकाच्या सदस्यांनी स्थानिकांच्या मदतीने बाहेर काढला. यानंतर, पोलीस प्रशासनाने रीतसर पंचनामा केला. सदर रेस्क्यू ऑपरेशन राबविण्यासाठी पथकाचे राहुल साखरे, अमर खडसे, ओम वानखडे, सतीश गावंडे, सौरव इंगोले, प्रदीप सावळे, आदित्य इंगोले यांचे मोलाचे सहकार्य मिळाले.

याप्रसंगी शेलूबाजार चौकीचे जमादार अनिरुद्ध भगत, शिपाई गोपाल कव्हर उपस्थित होते.