वाशिम : हिंदुहृदयसम्राट बाळासाहेब ठाकरे समृद्धी महामार्गावर अपघातांची मालिका चालूच असून ७ एप्रिल रोजी सकाळी ट्रक व बोलेरो पिकपचा अपघात झाला आहे. यामध्ये दोन जण गंभीर जखमी झाल्याची घटना मंगरुळपीर तालुक्यातील शेंदूरजना मोरे येथिल ओव्हरब्रिज जवळ घडली.
लासलगावहून नागपूरकडे कांदा घेऊन जाणारा डब्ल्यु.बी. ३३ इ ९९५९ क्रमांकाचा ट्रक सकाळी ५.३० वाजता पलटी झाला. पलटी झालेला ट्रक ओव्हर ब्रिजसमोर असल्याने मागुन येत असलेल्या एम.एच. १६ सी.डी. ४९०९ या ट्रकने अचानक ब्रेक लावले. त्यामुळे मागून येणाऱ्या भरधाव वेगाने नाशिकहून नागपूरकडे द्राक्षे घेऊन जाणारी एम.पी. २० जी.बी ६५८८ क्रमांच्या बोलेरो पिक गाडीने ट्रकला मागुन जोरदार धडक दिली.
यामुळे द्राक्ष वाहतूक करणाऱ्या गाडीतील चालक व वाहक घनश्याम पटेल (२५), राजा अहिरवल (२१) गंभीररीत्या जखमी झाले आहे. तसेच कांदा वाहतूक करणाऱ्या ट्रकमधील चालकालाही किरकोळ मार लागला. अपघाताची माहिती मिळताच समृद्धी महामार्गावरील रेस्क्यू टीम व पोलीस प्रशासन यांनी घटनास्थळी धाव घेऊन जखमीना समृद्धी महामार्गावरील रुग्णवाहीकेच्या साह्याने नजीकच्या रुग्णालयात दाखल केले.