अठ्ठावीस गावे पाणीपुरवठा योजना पूर्ववत

नागरिकांनी सोडला सुटकेचा श्वास : नागरिकांनी मानले ‘लोकमत‘चे आभार

लोकमत न्यूज नेटवर्क
मानोरा :तालुक्याला पाणीपुरवठा करणारी २८ गावे पाणीपुरवठा योजना १ कोटी २७ लाख रुपये पाणीकर थकल्याने जीवन प्राधिकरणने ३१ मेपासून सदर योजना बंद करण्याचा निर्णय घेतला होता. पाणीपुरवठा योजना बंद झाल्याने योजनेत समाविष्ट गावांचा घसा कोरडा झाला असताना या प्रकरणाची दखल घेत ‘लोकमत’ने २८ गावे पाणीपुरवठा योजना बंद प्रतिनिधी लक्ष देण्याची देण्याची गरज या मथळल्याखाली २ जुन रोजी वृत्त प्रकाशित केले होते. वृत्ताची दखल घेत कारंजा-मानोरा विधानसभा मतदारसंघाचे आमदार राजेंद्र पाटणी यांनी योग्य शिष्टाई करत पाणीपुरवठा योजना पूर्ववत करण्यात आली. पाणीपुरवठा योजना पूर्ववत झाल्याने नागरिकांनी सुटकेचा श्वास सोडून ‘लोकमत’चे आभार मानले.
तालुक्यासाठी अतिशय महत्त्वाकांक्षी असलेली २८ गावे पाणीपुरवठा योजना पाणी कर थकल्याने सदर योजना तोट्यात चालवणे अशक्य असल्यामुळे महाराष्ट्र जीवन प्राधिकरणाच्यावतीने ३१ मेपासून ही योजना बंद करण्याचा निर्णय घेतला होता. पाणीपुरवठा योजना बंद झाल्याने नागरिकांना पाण्यासाठी भटकंती करावी लागत होती. शिवाय, नागरिकांना दूषित पाण्याचा सामना करावा लागत होता. त्यामुळे नागरिकांचे आरोग्य धोक्यात आले होते. ही गंभीर बाब लोकमतने वृत्त प्रकाशित केली. या वृत्ताची दखल घेत आमदार राजेंद्र पाटणी यांनी महाराष्ट्र जीवन प्राधिकरणाचे कार्यकारी अभियंता कैलास जीवने यांच्याशी चर्चा करून १५ पर्यंत टाकीत पाणी करची तरतूद मुख्य कार्यकारी अधिकारी गणेश पाटील यांच्याशी चर्चा करून उपलब्ध करून देण्यात येईल, अशा सूचना केल्या. त्यामुळे आमदार पाटणी यांच्या विनंतीला मान देऊन सदर पाणीपुरवठा योजना पूर्ववत करण्यात आली.

२८ गावे पाणीपुरवठा योजना ही मानोरा तालुका यासाठी वरदान आहे. ही योजना कायमस्वरूपी सुरू राहावी, यासाठी नागरिकांनी १५ जूनपर्यंत आपले थकीत पाणीकर भरून सहकार्य करावे.
- भानू भिका जाधव, सरपंच कारखेडा

अकोला जिल्हा परिषदेने माजीप्रासाठी अकोट तालुक्यातील ८४ गावांसाठी ३२ लाख रुपये दिले. त्याच धर्तीवर वाशिम जिल्हा परिषदेने माजीप्राकडे निधी भरावा जेणेकरून सदर योजना चालवणे शक्य होईल.
- कैलास जीवने,
कार्यकारी अभियंता, महाराष्ट्र जीवन प्राधिकरण