मतदानाच्या टक्केवारीची आकडेमोड; निकालाकडे लक्ष !

एप्रिल ते डिसेंबर २०२० या कालावधीत मुदत संपलेल्या वाशिम तालुक्यातील २४, रिसोड ३४, मालेगाव ३०, मंगरुळपीर २५, कारंजा २८ आणि मानोरा तालुक्यातील २२ अशा जिल्ह्यातील एकूण १६३ ग्रामपंचायतींमध्ये निवडणुकीचा कार्यक्रम घोषित केला होता. दरम्यान, १६३ पैकी ११ ग्रामपंचायती अविरोध झाल्याने १५ जानेवारी रोजी १५२ ग्रामपंचायतींच्या १२३३ जागांसाठी मतदान झाले. सरासरी ७५.८६ टक्के मतदान झाले असून, सर्वाधिक मतदान मालेगाव तालुक्यात ७८.०५ तर सर्वात कमी मतदान मानोरा तालुक्यात ७१.२० टक्के झाले. १८ जानेवारी रोजी निकाल असून, मतदानानंतर टक्केवारीची आकडेमोड करीत विजयाचे गणित जुळविण्यात पॅनल प्रमुख, उमेदवार व्यस्त असल्याचे दिसून येते. ग्रामीण भागातील चावडी आणि पारावर सुद्धा आपल्या वॉर्डातून कोण निवडून येणार याची चर्चा रंगत असल्याचे दिसून येते. कुठे परिवर्तनाच्या तर कुठे विकासाच्या नावाने गप्पा रंगत आहे. काही वाॅर्डात नात्यागोत्यातील मतदानाच्या समीकरणांची आकडेमोड केली जात आहे. सर्वच उमेदवारांच्या कार्यकर्त्यांना आपलाच विजय होईल अशी खात्री वाटत असली तरी क्रॉस व्होटिंगमुळे पराभवाची धाकधूकही कायम आहे. निवडणुकीचा अंतिम निकाल लागेपर्यंत कार्यकर्त्यांमधील दावे-प्रतिदावे सुरूच राहणार असून, १८ जानेवारीच्या निकालाकडे सर्वांचे लक्ष लागून आहे.

००००००००००

मतदानाची अंतिम टक्केवारी

तालुकाटक्केवारी

वाशिम ७७.५६

रिसोड ७६.६२

मालेगाव ७८.०५

मं.पीर ७४.९०

कारंजा ७४.७२

मानोरा ७१.२०