झनकांच्या ज्ञानदानाचा झरा विद्यार्थ्यांसाठीच वाहे अखंड!

वाशिम : गेल्या १४ वर्षांपासून कार्य करताना वर्षातील ३६५ दिवस सकाळी ७ ते सायंकाळी ६ वाजेपर्यंत अविश्रांत कार्य करणारे शिक्षक म्हणून विनोद झनक यांची संपूर्ण जिल्ह्यात ओळख आहे. त्यांच्या ज्ञानदानाचा झरा विद्यार्थ्यांसाठीच अखंड वाहत असून नावीन्यपूर्ण शिक्षणातून शेकडो विद्यार्थी घडत आहेत. शिक्षक दिनानिमित्त त्यांच्या कार्याचा घेतलेला हा आढावा...

सध्या साखरा (ता. वाशिम) येथील अटलबिहारी वाजपेयी आंतरराष्ट्रीय शाळेत शिक्षक म्हणून कार्य करणाऱ्या विनोद झनक यांनी ग्रामीण भागातील गोरगरीब विद्यार्थी स्पर्धा परीक्षांमध्ये चमकावे, या उद्देशातून विद्यार्थ्यांना शिक्षणाचे धडे दिले. त्याची अपेक्षित फलश्रुती देखील झाली. त्यांनी घडविलेले ३७ विद्यार्थी नवोदयमध्ये शिक्षण घेत आहेत. शिष्यवृत्तीच्या परीक्षेत २७ विद्यार्थी चांगल्या गुणांनी उत्तीर्ण झाले. त्यांना शिक्षणासाठी शिष्यवृत्ती मिळत आहे. एनएमएमएस या प्रतिष्ठेच्या परीक्षेत २५ विद्यार्थ्यांनी घवघवीत यश संपादन केले. त्या सर्वांना १२ हजार रुपये प्रतिवर्ष याप्रमाणे चार वर्षे ४८ हजार रुपयांची शिष्यवृत्ती मिळत आहे.

.................

उत्कृष्ट ज्ञानदानाच्या कार्याचा गाैरव

शिक्षक विनोद झनक त्यांच्या कार्याला न्याय देत गेले आणि त्यातूनच शाळेच्या नावलाैकिकासह विद्यार्थीही घडत गेले. त्यांच्या कार्याची दखल घेऊन शाळा व्यवस्थापन समितीने त्यांना आदर्श शिक्षक सन्मान पुरस्काराने सन्मानित केले. शिक्षक सहकारी पतसंस्थेने उत्कृष्ट शिक्षक पुरस्कार बहाल केला. मराठा सेवा संघ व वाशिम पं.स.नेही कोरोना योद्धा पुरस्कार देऊन झनकांना सन्मानित केले.

................

शैक्षणिक क्षेत्रात नावीन्यपूर्ण प्रयोग

शिक्षक विनोद झनक यांनी ज्ञानदानासोबतच नावीन्यपूर्ण प्रयोगही केले. स्पर्धा परीक्षेसाठी लागणारे विविध संदर्भ साहित्य, वेगवेगळ्या प्रकाशनाची पुस्तके, शालेय पातळीवर सराव म्हणून परीक्षांचे आयोजन, व्यक्तिमत्व विकास स्पर्धा, कार्यशाळा, विविध प्रशिक्षण, निबंध स्पर्धा, वक्तृत्व स्पर्धांचे आयोजन करून त्यांनी विद्यार्थ्यांच्या सुप्त कलागुणांना सतत प्रोत्साहित केले.

.................

चौकटीबाहेर जाऊन कार्य करणारे शिक्षक

चौकटीबाहेर जाऊन कार्य करण्याची जिद्द व योग्य नियोजन असेल तर तुम्हाला यशापासून कुणीही दूर ठेवू शकत नाही, असे शिक्षक विनोद झनक यांचे म्हणणे आहे. त्यांनी स्वत: हे सूत्र अमलात आणले. वर्षातील ३६५ दिवस रजा न घेता त्यांनी ज्ञानदानाचे कार्य केले. तंत्रज्ञानाचा वापर करत शाळेची व विद्यार्थ्यांची गुणवत्ता त्यांनी कमी होऊ दिली नाही.