श्री पार्श्वनाथ जन्म व दीक्षा कल्याणक महोत्सव उत्साहात

वाशीम - जिल्हयातील शिरपूर येथील अंतरिक्ष पार्श्वनाथ श्वेतांबर संस्थानकडून दिनांक ७ ते १० जानेवारी या कालावधीत झालेल्या कार्यक्रमादरम्यान श्री पार्श्वनाथ जन्म व दीक्षा कल्याणक महोत्सवाचे आयोजन करण्यात आले होते. अंतरिक्ष तीर्थक्षेत्राचे विकास प्रणेते पंन्यास प्रवर प. पू. विमलहंस विजयजी महाराज व पन्यास प्रवर परमहंस विजयजी महाराज यांच्या मार्गदर्शनाखाली आयोजित केलेल्या या महोत्सवात देशभरातील भाविकांनी उपस्थित राहून तीन दिवस भक्तीभावना व धार्मिक कार्यक्रमांमध्ये उत्साहाने सहभाग घेतला. या महोत्सवाला गुजरात, तामिळनाडू, कर्नाटक, महाराष्ट्र, आंध्रप्रदेश, मध्यप्रदेश, उत्तरप्रदेश आदी ठिकाणाहून मोठ्या संख्येत भाविकांनी उपस्थित राहात तीन दिवस उपवास व तप केले. तसेच जन्म व दीक्षा कल्याणक महोत्सवानिमित्त सामाजिक व धार्मिक कार्यांतर्गत ठिकठिकाणी गरजवंतांना मदत, ब्लॅंकेटचे वितरण, बालकांना कानटोपी, शिरपूर व परिसरात प्रसादाचे वाटप करण्यात आले.